Tert.am-ը գրում է.
Ռուսական և սիրիական հատուկ նշանակության ջոկատն ավարտել է երեքշաբթի օրը Սիրիայում կործանված ՌԴ ռազմաօդային ուժերի Սու-24 ռմբակոծիչի 2-րդ օդաչուի փրկության գծով գործողությունը։ Այդ մասին չորեքշաբթի օրը հայտնել է ռազմական գերատեսչության ղեկավար բանակի գեներալ Սերգեյ Շոյգուն:
«Գործողությունը հաջող է ավարտվել: Օդաչուն տեղափոխվել է մեր բազա: Ողջ և առողջ»,- ասել է նախարարը Ռուսաստանի պաշտպանության նախարարության կոլեգիայի նիստին, փոխանցում է «ՌԻԱ Նովոստի» գործակալությունը։
Նախարարը նշել է, որ գործողությունը շարունակվել է 12 ժամ և շնորհակալություն է հայտնել «մեր բոլոր տղաներին, որոնք հսկայական վտանգով աշխատել են ողջ գիշեր»։ «Մոսկվայի ժամանակով ժամը 03:40-ին նրանք ավարտել են այդ աշխատանքը»,- նշել է Շոյգուն։
«Ես զեկուցել եմ գործողության հաջող ավարտի մասին գլխավոր գերագույն հրամանատարին (նախագահ Վլադիմիր Պուտինին): Նա խնդրել է շնորհակալության խոսքեր հայտնել ողջ անձնակազմին, որը մասնակցել է այդ գործողությանը»,- ասել է Շոյգուն։
Հիշեցնենք, որ երեկ ռուսական ռազմական ինքնաթիռը կործանվել էր Սիրիայում։ ՌԴ նախագահ Վլադիմիր Պուտինը հայտարարել էր, որ ինքնաթիռը խփվել է թուրքական F-16 կործանիչից արձակված «օդ-օդ» տիպի հրթիռով և ընկել է Սիրիայի տարածքում՝ Թուրքիայի սահմանից 4 կմ հեռու։ Ռուսաստանի նախագահը տեղի ունեցածը «թիկունքից հարված» էր որակել, որն արվել է հօգուտ ահաբեկիչների։
