Միջազգային տարբեր կազմակերպությունների և գործարարների կողմից երկրում ներդրումներ կատարելու խթան կարող է հանդիսանալ հարկային բարենպաստ դաշտը:
Վերջին տարիներին այս ոլորտում կատարվել են զգալի փոփոխություններ: Տեխնիկական արդիականացումից և վճարում կատարելու դյուրացումից զատ կարևոր է նաև բուն հարկը և իր դրույքաչափը:
Հայաստանում ամերիկյան բիզնես գործունեությունը խթանելու և բարենպաստ միջավայր ստեղծելու նպատակով երկու կողմերի միջև նախատեսվում է եկամուտների և գույքի կրկնակի հարկումը բացառելու մասին համաձայնագիր ստորագրել:
Այս հարցում նախաձեռնողը Հայաստանն է: Ի տարբերություն հայկական կողմի՝ ամերիկացիները դեռ սպասում են իրենց մասնավոր հատվածի կողմից խնդրի բարձրացմանը: Հայկական կողմը գտնում է, որ կարիք չկա սպասել, մինչև խնդիրը բարձրաձայնվի գործարարների կողմից: Այլ կերպ ասած, կարիք չկա սպասել, որ «դանակը հասնի ոսկորին»:
