Pastinfo.am-ը գրում է.
Սիրիայի նախագահ Բաշար Ասադի և խաղաղ բանակցությունների ապագան պետք է որոշեն իրենք՝ սիրիացիները: Այս մասին «ՏԱՍՍ»-ի փոխանցմամբ, հայտարարել է ՄԱԿ-ի գլխավոր քարտուղար Պան Գի Մունը:
«Սիրիայի ապագան և խաղաղ բանակցությունների ապագան չպետք է լինի մեկ մարդու ապագայից կախված հարց: Ես կարծում եմ, որ սիրիացիների գործն է որոշել նախագահ Ասադի ապագան»,- նշել է նա՝ Ժնևում մամուլի ասուլիսի ժամանակ պատասխանելով լրագրողների հարցերին:
Վիեննայում սիրիական կարգավորման բանակցությունների վերաբերյալ Պան Գի Մունը նշել է, որ դրանցում խոսքն առաջին հերթին գնում է այն մասին, թե «ինչպես վերսկսել խաղաղ գործընթացը»: «Ներկա պահին ամենից առաջ անհրաժեշտ է ամբողջ երկրով մեկ հրադադար հաստատել, որպեսզի հնարավոր լինի մարդասիրական օգնություն հասցնել բազմամիլիոն մարդկանց, որոնք դրա կարիքն ունեն»,- պարզաբանել է նա: Ըստ գլխավոր քարտուղարի, անհրաժեշտ է «իսկական երկխոսության» ձեռնամուխ լինել: ՄԱԿ-ը «պատրաստ է անել ամեն հնարավորը քաղաքական գործընթացի առաջընթացի համար»:
«Մենք պատրաստ ենք աշխատել սիրական կողմերի հետ, որպեսզի հաստատվի ծայրաստիճան անհրաժեշտ հրադադար ամբողջ երկրի մասշտաբով և սկսվի սիրիացիների կողմից ղեկավարվող քաղաքական գործընթացը»,- ասել է նա:
Պան Գի Մունը նաև հույս է հայտնել, որ չնայած տարաձայնություններին, Ռուսաստանն ու ԱՄՆ-ը «ունակ կլինեն հասնել հետագա առաջընթացի» սիրիական ճգնաժամի քաղաքական կարգավորման հարցում:
«Թույլ տվեք ինձ գովել ԱՄՆ պետքարտուղար Ջոն Քերրիի և Ռուսաստանի արտաքին գործերի նախարար Սերգեյ Լավրովի առաջատար դերը արդյունքի հասնելուն աջակցելու հարցում (Վիեննայում սիրիական կարգավորման հարցով հանդիպմանը): Ես գիտեմ, որ էական տարաձայնություններ դեռևս մնում են: Ես հույս ունեմ, որ մոտակա շաբաթներին ու օրերին նրանք սիրիացիների ղեկավարությամբ կկարողանան հասնել ճգնաժամի քաղաքական լուծման հետագա առաջընթացի»:
Ինչպես ընդգծել է գլխավոր քարտուղարը, «ՄԱԿ-ը պատրաստ է սատարել խաղաղ ջանքերին»:
Պան Գի Մունը ողջունել է երեկ՝ հոկտեմբերի 30-ին սկսված վիեննական բանակցությունները: «Մասնակիցներին կոչ եմ անում հասնել փոխըմբռնման մի շարք առանցքային հարցերում՝ ներառյալ պատերազմի դադարեցմանն ուղղված դիվանագիտական ջանքերն արագացնելու անհրաժեշտությունը»,- ասել է նա՝ դրական գնահատելով նպատակին հասնելու «այս շատ անհրաժեշտ քաղաքական գործընթացը գործարկած» 17 երկրների ու Եվրամիության «ջանքերն ու նվիրվածությունը»:
Նյութի աղբյուր՝ http://www.pastinfo.am/hy/node/81949
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել