Tert.am-ը գրում է.
«Հայ ազգային կոնգրես» խմբակցության անդամ Նիկոլ Փաշինյանը այսօր ԱԺ–ում հայտարարեց, որ Սահմանադրության փոփոխությունների հանրաքվեից առաջ ԱԺ «Հանրապետական» խմբակցության պատգամավոր Հովհաննես Սահակյանը` «Նույնականացման քարտերի մասին» օրենքում լրացումներ և փոփոխություններ կատարելու մասին օրենսդրական փաթեթի հեղինակը, հանում է կրկնաքվեարկությունները բացառող հիմնական կռվանը ու տեղը ոչինչ չի առաջարկում` նշելով, որ ընտրություններից առաջ ընտրական համակարգում արմատական փոփոխություններ չի կարելի անել:
«Եթե մի երաշխիք հանում եք, ի՞նչն է խանգարում, որ մյուս երաշխիքը դնեք: Եթե ոչ, մարդիկ իրավունք ունեն մտածելու, որ եթե այդ կռվանը հանում եք, սրանով հընթացս լուծում եք կրկնաքվեարկությունների լայն բազա ստեղծելու խնդիրը: Արդեն հասկացաք` ում է պետք այդ բազան, կարծում եմ՝ հավելյալ բացատրությունների կարիք չկա:
Ըստ Նիկոլ Փաշինյանի, ստացվում է, որ նույնականացման քարտեր ունեցող 180 հազար քաղաքացու դեպքում դիտորդը կամ վստահված անձը չի կարող իմանալ` «հիմա այս մարդը ուրիշ տեղամասում քվեարկե՞լ է, թե ոչ» և տեսականորեն և գործնականորեն այդ դրոշմակնիքը 180 հազար քաղաքացու դեպքում չի լինելու:
Նիկոլ Փաշինյանը հուշեց, որ նման դեպքերում, երբ ժամանակը քիչ է, աշխարհում ընդունված են պրակտիկաներ, որոնցից մեկն էլ հատուկ չջնջվող թանաքներով մատը թանաքոտելու պրակտիկան` քվեաթերթիկ տալուց առաջ։
Ի պատասխան` Հովհաննես Սահակյանը նկատեց, որ ընդամենը վերացնում են օրենքի հակասություններն ու հակասահմանադրական դրույթները, և «թույլ ենք տալիս, որ 183 հազար քաղաքացի կարողանան իրենց սահմանադրական իրավունքներն իրացնել: Դա ամենագլխավորն է»։
Իսկ կնքելը, ըստ Հովհաննես Սահակյանի, հանրային վստահությունը բարձրացնելուն կոչված հավելյալ գործիքն է, որոնք շատ քիչ են Նիկոլ Փաշինյանի մեկ ելույթի համեմատ:
«Ես ինքս ընտրական պրոցեսին մասնակցող անձ եմ, և մեր մոտ նախընտրական, ընտրական պրոցեսները, կարծես թե, անցնում են սահուն, նորմալ, բայց հենց գալիս է 20։00-ն, ընտրատեղամասերը փակվում են, որոշակիանում են հաղթողներն ու պարտվողները , չգիտես ինչու ամբողջ օրենսդրությունը «խախտվել է», ընտրակեղծիքները շատ են»,- նկատեց Հովհաննես Սահակյանը:
Ինչ վերաբերում է մատները թանաքոտելուն, ապա այստեղ ԱԺ հանրապետական պատգամավորն ուսումնասիրել է Հնդկաստանի, Վրաստանի փորձը և տեսել դրա բացասական հետևանքները:
«Նախ մատները թանաքոտելու առումով այլ քաղաքացու կարող էր անցնել, շատ հեշտ կարող էր բենզինով, ացետոնով ջնջվել, շատերն էլ այրվածք էին ստացել»,- ներկայացրեց Սահակյանը:
Մինչ նա պատասխանում էր Նիկոլ Փաշինյանը ծիծաղում էր, ինչի առնչությամբ ԱԺ հանրապետական պատգամավորը հարցրեց, թե ինչ անեկդոտ պատմեցին, որ ծիծաղեց:
Իսկ Նիկոլ Փաշինյանն էլ, օգտվելով արձագանքման իրավունքից, նկատեց, որ երբ Հովհաննես սահակյանը «Վրաստանում վատ էր» է ասում, դա իր համար հասկանալի է, քանի որ Վրաստանում 2 անգամ իշխանափոխություններ են եղել:
