Tert.am-ը գրում է.
ՌԴ արտգործնախարար Սերգեյ Լավրովը Վիեննայում ԱՄՆ-ի, Սաուդյան Արաբիայի և Թուրքիայի իր գործընկերների հետ բանակցությունների ավարտին տեղեկացրել է, որ Մոսկվան կոչ է արել Սիրիայի հարցով հետագա բանակցություններում ներգրավել Իրանին և Եգիպտոսին:
«Հետագա բանակցությունները կոչ ենք անում անցկացնել այնպիսի ներկայացուցչական ձևաչափով, որը ենթադրում է տարածաշրջանի մի շարք երկրների, հատկապես` Իրանի և Եգիպտոսի ներգրավվածությունը», - Լավրովին մեջբերում է Коммерсанть-ը:
ՌԳ ԱԳ նախարարի խոսքով` իրենք հատուկ են ընտրել Իրանն ու Եգիպտոսը, քանի որ այդ երկրները կարող են շատ հարցերում ազդել տիրող իրավիճակի վրա, և որոնց բացակայությունը գործընթացում օգտակար չէ:
Լավրովը հերքել է հավաստումներն այն մասին, որ Վիեննայի նախարարական հանդիպման ժամանակ քննարկվել է Սիրիայի նախագահ Բաշար ալ-Ասադի հեռացման հարցը:
Այսօր ավելի վաղ Սերգեյ Լավրովը հանդիպում էր ունեցել ԱՄՆ պետքարտուղար Ջոն Քերիի հետ, որի ընթացքում քննարկվել է հիմնականում Սիրիայի հարցը:
