Tert.am-ը գրում է.
Մարդու իրավունքների եվրոպական դատարանն այսօր հրապարակել է Բաքվի կենտրոնում ճեմուղու կառուցման պատճառով քանդված տների սեփականատերերի բողոքի գործով իր առաջին վճիռը։
Ինչպես տեղեկացնում է contact.az-ը, ՄԻԵԴ-ը բավարարել է Նուրի Խալիկովայի բողոքը՝ Մարդու իրավունքների ու ազատությունների եվրոպական կոնվենցիայի 5-րդ (ազատության իրավունք), 8-րդ (բնակարանի իրավունք) և 1-ին (սեփականության իրավունք) հոդվածներով:
Ստրասբուրգի դատարանը վճռել է, որ Բաքուն որպես նյութական փոխհատուցում պետք է վճարի 45.000 եվրո, իսկ բարոյական վնասի համար՝ 15.000 եվրո: Եվս 2.500 եվրո պետք է վճարվի դատական ծախսերի համար:
2010-2012 թվականներին իշխանությունները քանդել էին մի քանի փողոցների ցածրահարկ տները՝ այգի կառուցելու նպատակով:
Դա, սակայն, բնակիչների դժգոհության պատճառ էր դարձել, քանի որ փոխհատուցման չափերն իրենց հետ համաձայնեցված չէին եղել։
Ընդհանուր առմամբ, կառուցված այգու տարածքից տեղափոխվել էր 5.000 ընտանիք։
