Այն, ինչ տեղի է ունեցել կրթության և գիտության նախարարի տեղակալ Կարինե Հարությունյանի հետ, չի կարող տեղավորվել և ոչ մի շրջանակում: Կառավարության նիստում ներկայացնելով Երևանի թիվ 62 դպրոցը ՀՀ ազգային հերոս Թաթուլ Կրպեյանի անունով կոչելու նախագիծը՝ փոխնախարարը երկու անգամ հերոսի ազգանունը ներկայացրել է Կրեպյան: Եվ դա լեզվի սայթաքում չի եղել, ինչը վկայում է փոխնախարարի՝ վստահված գործին ձևական մոտեցում ցուցաբերելու, ազգային արժեքներին անհաղորդ լինելու մասին:
Կրթական բարեփոխումներ իրականացնող նախարարությունը, պարզվում է, նախ բարեփոխումներ պետք է իրականացնի իր կազմում:
Եվրոպական կրթական համակարգերը, Բոլոնյան գործընթացներն առոչինչ են, եթե կրթական համակարգը և այն ղեկավարողները մինչև ուղնուծուծն ազգային չեն:
Առաջին հայացքից անմեղ թվացող այս վրիպակը խոսում է նաև այն մասին, թե որքան ձևական ու անսիրտ են մոտենում իրենց պարտականությունների կատարմանը մեր որոշ չինովնիկներ:
Ամեն դեպքում, փոխնախարարը կրկնուսույցի կարիք ունի:
