Tert.am-ը գրում է.
Իսպանական La Tribuna del País Vasco պարբերականի վերլուծաբան լրագրող Նիկոլաս դե Միգելը ծավալուն հոդված է հրապարակել Հայոց ցեղասպանության մասին` անդրադառնալով նաև բնաջնջման արշավի արդյունքում հասցված մշակութային վնասին, ողջ մարդկությանը պատկանող դարավոր մշակութային ժառանգության կործանմանը:
«1915-ի ապրիլի 24-ին Ստամբուլում` հնագույն Կոնստանդնուպոլսում, սկսվեց մեծ կոտորածը, բնաջնջման փորձ, որը դարձավ 20-րդ դարի առաջին համակարգված, զանգվածային Ցեղասպանությունը:
Այն իրականացվեց բացարձակ հստակությամբ` սկսելով սոցիալ–մշակութային և կրոնական վերնախավից`ասես գլխատելով Արևմտյան Հայաստանի բնակչությանը: Օսմանյան կայսրության հայ համայնքը նախկինում արդեն մի շարք հետապնդումների էր ենթարկվել, որոնք նախապատրաստությունն էին Ցեղասպանության: Համայնք, որի հազարամյա մշակութային ժառանգությունը այժմ արմատավորված է աշխարհագրական նվազագույն տարածքում: Ահա, թե ինչու հայերի ֆիզիկական բնաջնջմանը գումարվում է մշակութային ցեղասպանությունը, որի հետևանքն այն է, որ պատմական Հայաստանի 90 տոկոսը, բացի Կիլիկիայից, որը տարածվում էր մինչև Բարձր դուռ նավահանգիստ, գտնվում է ներկայիս Թուրքիայի տարածքում:
Ցեղասպանությունն սկսվեց գարնանը` մեկ դար առաջ` որպես հանցագործություն ողջ մարդկության մշակութային ժառանգության հանդեպ: Հայոց հարցը, հետևաբար, արդիական է, այն բաց վերք է, որը արյունահոսում է և չի բուժվի, եթե վերջնական ճանաչում չգտնի:
Այս ազգային-մշակութային Ցեղասպանությունը ավելի քան մեկուկես միլիոն հայի կյանք է խլել, այն էլ՝ ամենաահասարսուռ կերպով, որ հնարավոր է պատկերացնել: Ահա, թե ինչու այդ օրը պետք է հիշենք որպես սգո օր ողջ մարդկության համար, որպես սև օր հայերի համար, որոնք բնակվում են ինչպես անդրկովկասյան երկրում, այնպես էլ՝ Սփյուռքում»: