1in.am-ը գրում է.
Թուրքիայի Բուրդուր քաղաքի Հանրապետության հրապարակում «100 տարվա սուտը՝ Հայոց ցեղասպանություն անունով» խորագրով խիստ հակահայ բովանդակությամբ բացօթյա մամուլիս ասուլիս է անցկացվել։ Այս մասին հայտնում է «Գյունդեմ Բուրդուր» կայքը։
Մեհմեթ Աքիֆ Էրսոյի անվան համալսարանի ուսանողների նախաձեռնությամբ իրականացված միջոցառմանը բազմաթիվ մարդ է մասնակցել, այդ թվում նաև երեխաներ։ Հավաքվածները հանդես են եկել հայատյաց կոչերով, պարզել Թուրքիայի և Ադրբեջանի դրոշները։ Կազմակերպիչները, խեղաթյուրելով պատմական փաստերն ու վկայակոչելով Թուրքիայի կողմից հորինված իրադարձությունները, ոչ միայն ժխտել են Հայոց ցեղասպանության փաստը, այլև հայերին մեղադրել Արևմտյան Հայաստանում և Արցախում կոտորածներ իրականացնելու մեջ։
2015 թվականին ընդառաջ՝ թուրքական կողմն ակտիվացրել է Հայոց ցեղասպանության դեմ պայքարը տարբեր ճակատներում, այդ թվում և գիտական ուղղությամբ: Թուրքիան տպում է Ցեղասպանությունը ժխտող բազմալեզու գիտական գրականություն, անցկացնում տեղական և միջազգային սեմինարներ ու գիտաժողովներ: Թուրքիան նաև ֆինանսավորում է միջազգային կարևորություն ունեցող համալսարաններում Ցեղասպանության փաստի ժխտմանն ուղղված քայլերը:
Բացի այդ, աշխարհի տարբեր երկրներում բնակվող թուրքերը նաև Անկարայի միջամտությամբ կազմակերպում են հակահայ ակցիաներ, միջոցառումներ:
