Tert.am-ը գրում է․
Արևելյան գործընկերությունը մի ծրագիր է, որին ներգրավված է Եվրամիությունը, և այս ծրագիրը շատ երկար է ծրագրվել: Այս մասին ասաց ՀՀ-ում Լեհաստանի Հանրապետության արտակարգ և լիազոր դեսպան Եժի Նովակովսկին՝ ՀՀ-ում Լեհաստանի Հանրապետության դեսպանության աջակցությամբ հրավիրված հասարակական-քաղաքական քննարկման ժամանակ:
Չնայած որոշների քննադատություններին՝ դեսպանն ընդգծեց, որ Արևելյան գործընկերության ծրագիրը նպատակ չունի ինչ-որ ծրագրի դեմ հանդես գալ: «Ռուսաստանի դեմ չի ստեղծվել այս ծրագիրը, հուսով, որ մի օր էլ Ռուսաստանը կարող է մաս կազմել այս ծրագրին: Այդ ծրագրի նպատակը եղել է՝ հեշտացնել մարդկանց շփումը և տնտեսական բնագավառում փոխանակումները»,- ասաց նա և նշեց, որ սկզբնապես իրենց նպատակը եղել է Արևելյան գործընկերների հետ ամրացնել այն կապերը, որոնք արդեն իսկ գոյություն ունեն:
«Այն համակարգը, որը մենք ցանկացել ենք ստեղծել ԵՄ-ի շուրջ դա այն է, որ մենք լինենք և՛ սպառող, և՛ արտադրող այն ապրանքների, որոնք կարող են լինել հարևան երկրների շուկաներում»,- ասաց նա և ավելացրեց, որ դա վերաբերում է ինչպես նյութական, այնպես էլ մտավոր արժեքներին:
«Հայաստանը Եվրոպական երկրների՝ Լեհաստանի ու ավելի շատ Ֆրանսիայի կողմից դիտարկվում է որպես կարևոր մի երկիր: Դրա արդյունքն այն է, որ երկար տարիներ շարունակ բազմաթիվ հայեր բնակվել են Լեհաստանում: Երբ ես ասացի, որ պատրաստվում եմ Հայաստանում ստանձնել իմ առաքելությունը, բոլորի կողմից դա ողջունվեց»,- ասաց նա և նշեց, որ իրենք հասկանում են, որ Հայաստանը Եվրոպային շատ մոտ ու հարազատ երկիր է համարվում:
«Հայաստանը գտնվելով այս տարածաշրջանում այն երկրներից է, որը ընկալելի և ճանաչելի եվրոպացիների համար: Արևելյան գործընկերությունը նաև քաղաքական ծրագիր է, և այն ենթադրում է, որ այն երկրները, որոնք ցանկանում են մաս կազմել այդ ծրագրին, պետք է ցանկանան մոտենալ քաղաքական Եվրոպային»,- ասաց նա և նշեց, որ Արևելյան գործընկերության ծրագիրը երկու մաս ունի՝ քաղաքական և տնտեսական:
Նա նկատեց, որ Հայաստանը վերջին պահին հրաժարվեց Ասոցացման համաձայնագիրը ստորագրելուց՝ ելնելով այլ տնտեսական համակարգին միանալու որոշումից: «Ունեցանք Բելառուսի և Ադրբեջանի օրինակը, որոնք ի սկզբանե որոշել էին մասնակցել այդ ծագրի մի մասին»,- ասաց նա և նշեց, որ երկու երկիր որոշեց ստորագրել Ասոցացման համաձայնագիրը՝ Վրաստանը և Մոլդովան:
Անդրադառնալով՝ 2015 թվականի մայիսի 21-22-ը Ռիգայում կայանալիք Եվրամիության Արևելյան գործընկերության հերթական գագաթաժողովին՝ ասաց, որ այնտեղ հստակ որոշումներ պետք է կայացվեն և ծրագրեր ուղենշվեն: «ԵՄ տեսանկյունից Ռիգայի գագաթաժողովը նպատակ է ունենալու դասակարգել իր գործընկերներին: Քաղաքական տերմինաբանությամբ ասած՝ ավելին ավելիի դիմաց»,- ասաց նա:
Նա հույս հայտնեց, որ Հայաստանը, որը հիմա գտնվում է բանակցային փուլում կհստակեցնի իր դիրքորոշումը ԵՄ-ի հետ և համագործակցության սահմանները: Նա նշեց, որ իրենք տեսնում են, որ Հայաստանն արդյունավետ կարողանում է իրականացնել այն նորմերը, որոնք վերաբերում են մարդու իրավունքների պաշտպանությանը, քաղաքական զարգացմանը:
«Պետք է ըմբռնումով մոտենանք, որ Հայաստանը կմիանա քաղաքական մասին՝ բաց թողնելով տնտեսական մասը, քանի որ այն անհամատեղելի է՝ հաշվի առնելով, որ Հայաստանն այլ տնտեսական համակարգում է գտնվում և չի կարող ստորագրել ազատ և համապարփակ համաձայնագիրը: Իհարկե, սա Հայաստանի կառավարության և ժողովրդի որոշումն է, ինչ որոշում էլ կայացնի, մենք ողջունելու ենք և աջակցելու ենք այն»,- ասաց նա:
