Tert.am-ը գրում է․
ԱԺ պետաիրավական հանձնաժողովի նախագահ, ՀՀԿ-ական պատգամավոր Հովհաննես Սահակյանը Tert.am-ի հետ զրույցում, ըստ էության, ողջունեց այն, որ ԲՀԿ-ն հայտարարվեց ընդդիմադիր կուսակցություն:«Հետևաբար, գոնե դասական քաղաքագիտական առումով կունենանք ընկալումներին համապատասխան իրավիճակ, որ ընդդիմությունը ընդդիմություն է, իշխանությունը՝ իշխանություն»,-ասաց Հովհաննես Սահակյանը: Նրա համար նաև հետաքրքիր է, որ կուսակցության նախագահ է ընտրվել կին քաղաքական գործիչ:
-Իշխող քաղաքական ուժը հայտարարում էր, որ իրենց շատ հարցերի պատասխան պայմանավորված է նրանից, թե ինչ կորոշվի։ Եվ այսպես. Ծառուկյանը հայտարարեց, որ հեռանում է ակտիվ քաղաքականությունից, որ ԲՀԿ հարցերով իրեն չդիմեն, ներկայացրեց, թե ինչու է այդ քայլին դիմում, իսկ կուսակցությունն իրեն հռչակեց ընդդիմություն: Սրանք բոլորը ընդունելի՞ մոտեցումներ են և տեղավորվո՞ւմ են քաղաքական տրամաբանության մեջ, ինչի մասին շատ սիրում են սիրում կրկնել իշխող ուժի ներկայացուցիչները:
-Մեզ համար ընդունելի է, եթե Գագիկ ծառուկյանն իր համար որոշել է, որ հեռանում է քաղաքականությունից: Թե որքանով է դա տեղավորվում քաղաքական տրամաբանության մեջ, դա պետք է տան իր նաև իր կուսակիցները, ինչքանով է դա իրենց համար ընկալելի: Ինչ վերաբերում է մեզ, ապա ես, մենք հարգում ենք Գագիկ Ծառուկյանի որոշումը և կարծում եմ՝ յուրաքանչյուր անձ, քաղաքացի ինքը իրավունք ունի կայացնելու որոշում՝ գործունեության, իր ապագայի, իր հետագայի հետ կապված:
- ԲՀԿ-ն իրեն հռչակեց ընդդիմություն: Ձեզ համար սա ավելի ընդունելի՞ տարբերակ է, քան այլընտրանքը, որովհետև շատ քաղաքական գործիչներ ու վերլուծաբաններ պնդում են, որ սա քաղաքագիտական» նոնսենս» է, որովհետև նման բան գոյություն չունի: Լինում են կա՛մ ընդդիմություն, կա՛մ իշխանություն:
- Ճիշտ նկատեցիք: Ինձ համար՝ որպես մարդ, ով պառլամենտում ունի որոշակի պատասխանատվություն, շատ ավելի հասկանալի է, երբ ընդդիմությունը ընդդիմություն է, իշխանությունը՝ իշխանություն։ Չես կարող ընդդիմություն չլինել, բայց ընդդիմադիրներից ավելի ընդդիմադիր, կոշտ ու արմատական լինել:Հետևաբար, գոնե դասական քաղաքագիտական առումով կունենանք ընկալումներին համապատասխան իրավիճակ, որ ընդդիմությունը ընդդիմություն է, իշխանությունը՝ իշխանություն:
-Չնայած հանրապետականներդ միշտ ասում եք, որ շատ լավ է երկրում ուժեղ ընդդիմություն ունենալը, այնուամենայնիվ, հենց կոշտ քննադատության եք արժանանում, հայտարարում եք, որ նրանք անցնում են կոռեկտության սահմանը և այլն: Այսինքն՝ եթե ԲՀԿ-ից այլընտրանք ժամանակ էին կոշտ, ապա ընդդիմության ժամանակ ավելի կոշտ չե՞ն լինի:
-Ես պետք է նորից կրկնեմ, որ չպետք է շտապողականություն ցուցաբերել: Այս կուսակցությունն այս իրավիճակում և այս պայմաններում, որպես թե՛ ընդդիմադիր և թե՛ նոր վիճակում ու նոր ղեկավարի առկայության պայմաններում լրիվ այլ իրավիճակ է: Այնպես որ, կրկնում եմ՝ չշտապենք: Բայց նորից եմ նշում՝ անձամբ ինձ համար շատ ավելի հեշտ է, հետաքրքիր է, երբ որ մրցում ես, բանավիճում ես բովանդակային առումով ավելի պատրաստված ընդդիմության հետ, ավելի պատճառաբանված փաստարկներով: Եվ երբ փորձում ես քո հակափաստարկները ներկայացնել, շատ ավելի լրջորեն ես վերաբերվում: Եվ քննարկումն էլ ավելի ծանրակշիռ է լինում:
-ՀՀԿ փետրվարի 12-ի քաղխորհրդի նիստի հիմնական ուղերձն այն է, որ պետք է քաղաքական դաշտը մաքրել ապաքաղաքական տարրերից, ինչի արդյունքում, փաստացի, որ ԲՀԿ-ում մնացին բացառապես քաղաքական դեմքեր, իսկ գործարարները, և միայն Գագիկ Ծառուկյանին նկատի չունեմ, հեռացան: Հեռացան, բայց շարունակում են մնալ խորհրդարանում: Հետևաբար, ինչ տարբերություն՝ նրանք կուսակցո՞ւթյան ներսում էին, թե շարունակում են գործել անկախ: Թե՞ այդ գնահատականի հետ համամիտ չեք:
- Գնահատականը հետևյալն է. տեսեք՝ մենք ունենք համամասնական, ունենք մեծամասնական ընտրակարգ: Ոզում եմ ընդգծել, որ սահմանադրական բարեփոխումներով, որի տրամաբանության մեջ մտնում են ավելի մեծ գլոբալ և լայնամասշտաբ բարեփոխումներ, որպեսզի մեր ժողովուրդը ընտրությունների ժամանակ գնահատական տա քաղաքական թիմի ծրագրին: Կա՛մ լիդերի, կա՛մ քաղաքական գործչի ճանապարհին: Այլապես, դուրս է գալիս, որ մեր ժողովուրդը այսօր մի տեսակ … իր ընտրյալներին նայում է այլ տեսանկյունից, մեկ այլ աչքերով: Այս առումով, կարծում եմ, որ այն մարդիկ, որոնք օգնելու որոշակի հնարավորություններ ունեն կարող են մնալ պատգամավոր, բայց նորից նույն տեսակետին ենք, որ քաղաքականությամբ պետք է զբաղվեն բացառապես քաղաքական գործիչները: Եվ կարծում եմ նաև, որ աստիճանաբար կգա մի ժամանակ, երբ այլևս անհրաժեշտություն չի լինի որոշակի քայլեր, գործողություններ անել, բացատրական աշխատանքներ տանել։ Ուղղակի կլինեն պայմաններ, երբ գործարարը կզբաղվի բացառապես իր գործը, բժիշկը՝ իր, իրավաբանը՝ իր, քաղաքական գործիչը՝ իր: Եվ երբ նայում ենք ելակետից, երբ մեր երկիրը նոր էր անկախացել, այն ժամանակվա ԱԺ-ին ու կազմին ու գործունեությանը, ապա համեմատության մեջ, այո՛, երևում է, որ այն պետք է լինի ժամանակ, որ մենք ունենանք պրոֆեսիոնալ Ազգային ժողով:
-Հայաստանի պատմության մեջ առաջին անգամ, նկատի չունեմ մի քանի մարդ կուսակցությունները, այլ ակտիվ և իր կուսակցականների ու պատգմավորների մեծաքանակությամբ, նաև այսօր՝ երկրորդ կուսակցությունը ՀՀԿ-ից հետո ղեկավարելու է կին քաղաքական գործիչ: Ինչպե՞ս եք սա գնահատում:
-Մենք ժողովրդավարական երկիր ենք, իրավական պետություն, որը իր քայլերով, բարեփոխումներով ընթանում է դեպի իրավական պետություն… եվ նաև՝ ուզում եմ հիշեցնել, որ մենք ունենք կուսակցությունների կին ղեկավարներ, ունենք կին փոխխոսնակ, կին նախարար: Հետևաբար, ես կարծում եմ՝ որպես երկրորդ խոշոր քաղաքական թիմ, որն ունի կին ղեկավար, ինձ համար էլ հետաքրքիր է: Իսկ ինչ վերաբերում է Նաիրա Զոհրաբյանին, որպես քաղաքականության մեջ եղած անձի,բավականին ակտիվ է, բավականին արագ է արձագանքում, բայց որևէ քաղաքական ուժի կշիռը բացառապես կախված չէ իր քաղաքական ուժի ղեկավարից: Հետևաբար, այս առումով գնահատականները դեռևս վաղ է, որ տանք, այլ խոսենք, բարին մաղթենք ժողովրդավարության, իրավական պետության բոլոր կանոններին համահունչ գործունեություն ծավալելու համար:
-Բայց առնվազն անսովոր է, որ ՀՀ պայմաններում՝ բացառապես օլիգարխներից ու տնտեսական գործիչներից բաղկացած կուսակցությունում նախագահ է դառնում կին քաղաքական դեմք:
- Ուզում եմ հիշեցնել, որ մենք էլի կին ղեկավարներ ունենք, օրինակ՝ Լյուդմիլա Սարգսյանը, եթե չեմ սխալվում՝ կուսակցության ղեկավար է: Եվ կարծում եմ՝ էլի կլինեն, եթե փորձենք վերհիշել: Իսկ այս դեպքում պետք է սպասենք մի փոքր, շտապողականություն չցուցաբերենք, այնուհետև տանք մեր գնահատականը:
