Newsline.am-ը գրում է․
Այսօր զինվորական երդման արարողություն է տեղի ունեցել ՌԴ սահմանապահ զորքերի Արմավիրի ջոկատում: ՏԱՍՍ-ի տեղեկացմամբ`երդվել է Հայաստանի Հանրապետության 50 քաղաքացի: Նրանք կծառայեն ՌԴ ԱԴԾ սահմանապահ ծառայության տեղի ստորաբաժանմունքում:
Ըստ Հայաստանի Հանրապետության և Ռուսաստանի դաշնության միջև 1994 թ. մարտի 15-ին կնքված «Հայաստանի Հանրապետության տարածքում գտնվող Ռուսաստանի Դաշնության սահմանապահ զորքերում Հայաստանի Հանրապետության քաղաքացիների համալրման զինվորական ծառայություն անցնելու կարգի մասին» համաձայնագրի` նորակոչիկները երդվել և պարտավորություն են ստանձնել բարեխղճորեն ծառայելու:
ՌԴ ԱԴԾ Սահմանապահ ծառայության պետ, գեներալ-մայոր Վյաչեսլավ Բիրյուկովը զինվորական երդման արարողության ժամանակ հայտարարել է, որ համալրված կազմը միշտ էլ հետաքրքիր է և Ռուսաստանը լավ հարաբերություններ ունի Հայաստանի իշխանությունների հետ ամենուր. «Չնայած սահմանային գոտում ամենօրյա լարվածությանը, այնուամենայնիվ, կարգն ու կանոնը պաշտպանվում է: Մենք լավ հարաբերություններ ունենք Հայաստանի իշխանությունների հետ ինչպես սահմանի վրա, այնպես էլ կենտրոնում»:
