Life.panorama.am-ը գրում է․
Լատվիայի անկախության 96-ամյակի առթիվ այսօր կազմակերպվել էր ընդունելություն: Ներկա էր ՀՀ Ազգային ժողովի նախագահ Գալուստ Սահակյանը, ինչպես նաև նախարարներ, դիվանագետներ, հասարակական, քաղաքական գործիչներ, պետական կառույցների ներկայացուցիչներ: Ինչպես նշեց Հայաստանում Լատվիայի դեսպան Էլիտա Գավելեն, Լատվիայի ժողովուրդն այսօր մեծ հպարտությամբ է ամփոփում անցած տարիների հաջողությունները: «Նույն հպարտությամբ էլ շարժվելու ենք առաջ: Հպարտ ենք, որ Լատվիան միացել է եվրոգոտու անդամ երկրներին, 2014 թվականին էլ Ռիգան ճանաչվել է Եվրոպայի մշակույթի մայրաքաղաք: Պետք է նշեմ, որ այս տարի Լատվիան հրավիրվել է անդամակցելու Տնտեսական համագործակցության և զարգացման կազմակերպությանը, մի կազմակերպություն, որը համախմբում է աշխարհի 34 ամենազարգացած երկրներին»,-ասաց դեսպանը՝ ընդգծելով, որ հունվարի 1-ից Լատվիան ստանձնելու է ԵՄ խորհրդի նախագահությունը:
