Cosmo.am-ը գրում է․
Գիտնականներն ասում են, որ գինին կարող է խոչընդոտել ավելորդ քաշ հավաքելուն: Այնպես որ, կարելի է բազմաթիվ օգտակար և «մաքրող» հյութերը փոխարինել մեկ բաժակ կարմիր գինով...
Հետաքրքիր է՝ ինչո՞ւ են աստղերն իրենց տանջում դիետաներով, եթե կարող են պարզապես գինի վայելել և չմտածել ավելորդ քաշի մասին: Վերջին ուսումնասիրությունները ցույց են տալիս, որ գինին (այո՛, գինին) կարող է օգնել վերահսկելու սեփական քաշը:
Իհարկե, եթե սկսես խմել շշերով կամ այն համատեղես քո սիրած պաղպաղակի հետ, դժվար թե քո երազած կազմվածքն ունենաս: Բայց չափավոր օգտագործումը (ասենք՝ օրական մեկ բաժակ) հիանալի արդյունք է տալիս:
Ե՛վ հաճույք, և՛ օգուտ
Հետազոտություններն իրականացվել են 13 տարի շարունակ միջին քաշ ունեցող մոտ 20 000 կանանց շրջանում: Պարզվել է, որ այդ տարիների ընթացքում օրական մեկ-երկու գավաթ գինի օգտագործող կանանց մոտ ավելորդ քաշ հավաքելու հավանականությունը 30 %-ով ավելի քիչ է, քան ալկոհոլ չգործածող կանանց մոտ:
Ի դեպ, ուսումնասիրվել է նաև այլ խմիչքների, օրինակ` լիկյորի և գարեջրի ազդեցությունը կանանց օրգանիզմի վրա: Բայց կարմիր գինու ներգործությունն այդ առումով ամենից արդյունավետն է: «Սա զարմանալի չէ. գինին ուրիշ առավելություններ էլ ունի: Այն հարուստ է հակաօքսիդանտներով, որոնք նվազեցնում են խոլեստերինի պարունակությունն օրգանիզմում և կարգավորում են արյան ճնշումը»,- ասում է նյույորքցի հայտնի դիետոլոգ Յանա Քլաուերը:
Պատճառներից մեկը հավանաբար այն է, որ խմիչքը յուրացնելիս օրգանիզմը մեծ քանակությամբ կալորիա է ծախսում: «Ի տարբերություն տղամարդկանց` ալկոհոլը յուրացնող ֆերմենտները կանանց մոտ արտադրվում են ավելի փոքր չափաբաժիններով: Գինին յուրացնելու համար մեր օրգանիզմը շարունակաբար արտադրում է այդ ֆերմենտները, ինչի արդյունքում շատ էներգիա է ծախսվում»,- ասում է բժիշկ Քլաուերը: Փաստորեն, գինին կանանց համար ավելի օգտակար է: Տղամարդիկ, ի տարբերություն մեզ, այդքան շատ կալորիա չեն կորցնում:
«Ալկոհոլն օրգանիզմին ստիպում է կալորիաներ այրել նաև ջերմարտադրության (թերմոգենեզիս) երևույթի շնորհիվ»,- ասում է գիտությունների դոկտոր, Բոստոնի Burgham and Womens հիվանդանոցի կանխարգելիչ բժշկության բաժանմունքի առաջատար մասնագետ Լու Վոնգը: Ալկոհոլը բարձրացնում է մարմնի ջերմաստիճանը (ահա թե ինչու այն խմելիս երբեմն այտերը կարմրում են): Այդ գործընթացի համար մեր օրգանիզմը նույնպես կալորիաներ է այրում:
... Եվ սա դեռ ամենը չէ
Ուսումնասիրությունները նաև ցույց են տվել, որ չափավոր քանակությամբ ալկոհոլ օգտագործող կանայք ավելի քիչ են ուտում: Հետազոտողները չեն կարող բացատրել այդ երևույթը: Գուցե պատճառն այն է, որ նրանք պարզապես սնունդ կլանելու փոխարեն նախընտրում են հանգիստ վայելել համեղ գինու հետ:
«Գինի ըմպելու պարագայում ավելորդ քաշի հավանականությունն իրոք փոքրանում է»,- ասում է դոկտոր Վոնգը: Դա, իհարկե, հիանալի է, բայց չի նշանակում, թե կարելի է ջուրը փոխարինել գինով: Եվ պետք է հիշել, որ գինին ևս բարձր կալորիականություն ունի. 150 գրամ գինու էներգետիկ արժեքը մոտ 130 կկալ է: Այս խմիչքը`որպես առանձին միջոց, ավելորդ քաշից ազատվելու տարբերակ չէ»:
Գինու չարաշահումը կարող է տարբեր առողջական խնդիրների պատճառ դառնալ, ինչպես օրինակ՝ կրծքի քաղցկեղի»,- ասում է բժիշկ Քլաուերը: «Մինչդեռ օրական մեկ-երկու գավաթ գինին` ճիշտ սննդակարգի և մարզումների հետ մեկտեղ, կարելի է ասել, առողջ ապրելակերպի նոր, ժամանակակից ձև է»,- ավելացնում է նա:
