Կնոջ և տղամարդու տարբերութունն ամենուր է, իսկ գովազդն էլ բացառություն չէ: Բնական է, որ տղամարդու և կնոջ համար նախատեսված ապրանքները չեն կարող նույն կերպ գովազդվել: Ահա և այս գրառումը նվիրված կլինի նրանց ուղղված գովազդների տարբերությանը:
Նկատե՞լ եք, որ գովազդներում տղամարդկանց վերաբերվող ապրանքները հիմնականում ներկայացվում են տեխնիկական տեսանկյունից, որտեղ բացատրությունը կատարվում է թվերի հիման վրա` 20 գիգաբայթ հիշողության ձայնասկավառակ, 14 մեգափիքսել տեսախցիկ, Optimax 225 շարժիչ և այլն: Այս ամենն արվում է ապրանքներն ընդգծելու համար, եթե այս թիվը կա, ուրեմն լավ որակ ունի կամ ավելի հզոր է, քան մնացածը: Իմանալով, որ մարդիկ ձգտում են հստակության և ունեն միշտ ամենալավ ապրանքը գնելու մղում՝ մարքեթոլոգներն առանձնացնում են այսպիսի ապրանքները թվերի օգնությամբ:
Իսկ կանայք ավելի շատ էմոցիոնալ տեսանկյունից են նայում իրերին, օրինակ` «Իմ մայրիկը միշտ այս բրենդն էր օգտագործում» կամ «Այսպիսի լվացքի փոշի իմ հարևանն էլ ուներ»: Լսե՞լ եք նման արտահայտություններ: Ես` այո ու բավականին շատ, ուստի իզուր չէ, որ գովազդներում օգտագործվում է հիմնականում կանացի խորհուրդը, մեկը, ով հարազատ է և ասում է, որ ինքն այդ լվացքի փոշին, մազերի ներկը կամ կոսմետիկան է օգտագործում: Հիշեք, եթե Ձեր թիրախը կանայք են, ապա չմոռանաք խորհրդի, նոստալգիայի, սեփական գերազանցության, վախի ու գեղեցկության մասին:
Երբևէ Ձեզ հարցրե՞լ եք, թե ինչու են հատկապես տղամարդիկ սկսել մարմնի հեղուկ օճառ օգտագործել պինդ օճառի փոխարեն: Այստեղ նույնպես գովազդի ու մարքեթոլոգների մատը խառն է, վստահեցնում եմ: Այո, հենց գովազդն էր, որ սկսեց տղամարդկանց համոզել` պինդ օճառը ձեռքից կարող է ընկնել, կեղտոտվել, այն իր վրա է հավաքում բակտերիաների: Հնարավոր է, որ մի օճառից մի քանիսն օգտվեն և ինչ-որ հավանական վարակ տարածվի: Իսկ ահա հեղուկ մարմնի օճառի դեպքում նման խնդիրները վերանում են: Բոլորս էլ գիտենք, որ գովազդում ներկայացվող խնդիրն ու դրա լուծումն իսկապես հսկայական ազդեցություն է ունենում սպառողի վրա:
Սակայն հեղուկ օճառ արտադրողները լուրջ խնդիրներ ունեին, քանի որ տղամարդիկ չէին ցանկանում ձեռքով հպվել սեփական մարմնին, ինչպես անում են կանայք: Շուտով այդ հարցին էլ լուծում տրվեց և ստեղծվեց չոր կտոր, որը միջանցիկ էր ձեռքի և մարմնի միջև: Այնուհետև այդպիսի կտորների արտադրություն սկսվեց, որի շնորհիվ նվազեց օճառի արտադրությունը:
Եթե մեր օրերում այցելեք սուպերմարկետի համապատասխան բաժին, ապա կտեսնեք, որ բոլոր ապրանքները տղամարդկային անուններ ունեն` Ripped, Fuel, Edge, Facial Fuel, Axe և այլն, որոնք առաջացնում են սպորտի, մրցակցության, տուրիզմի, պատերազմի ասոցիացիաներ: Մարքեթոլոգներն ուսումնասիրել են, որ այդ հնչեղ անունները տղամարդկանց թույլ են տալիս ավելի սպորտային ու առնական զգալ, անգամ եթե գնում են այնպիսի մի ապրանք, որն ավելի շատ գեղեցկությանն է վերաբերվում: Օրինակ` Procter & Gamble-ը պայքարում է այն բանի համար, որ տղամարդկանց ու կանանց խնամքի պարագաները լինեն խանութների տարբեր մասերում: Հիմնական պատճառը նրանում է, որ տղամարդ սպառողը կարող է ամաչել մաշկի խնամքի պարագաներին նայելիս որևէ կնոջ առկայությամբ, ուստի դրանք պետք է տարբեր տեղերում լինեն: Իսկ հիմա հարց. բայց Procter & Gamble-ում որտեղի՞ց գիտեն, որ տղամարդկանց ու կանանց խնամքի պարագաներն առանձնացնելիս վաճառքներն ավելանում են: Պատճառն ընկերության հետազոտությունն է, որը կատարվել է գիշերը:
Դուք գիտեք, որ Unilever, Kraft, PepsiCo և Coca-Cola ընկերություններն ունեն ոչ իրական սուպերմարկետներ, որոնք հիմնականում լինում են մեծ քաղաքների արդյունաբերական ու մոռացված մասերում: Այս բրենդների ներկայացուցիչները դարակներում դասավորում են ինչպես իրենց, այնպես էլ մրցակցի ապրանքները: Այնուհետև ուշ երեկոյան մարդկանց հրավիրում են, որպեսզի գնումներ կատարեն, որոնց հետևում են տեսախցիկները: Տեսախցիկներն այդ մթության մեջ նկարում են նաև մարդկանց ուղեղի աշխատանքը: Հենց այդ աշխատանքների հիման վրա էլ ընկերությունները կարողանում են որոշել, թե սուպերմարկետի որ մասում տեղադրված ապրանքն է ավելացնում վաճառքի ծավալները:
Հ.Գ. Ահա և պատճառը, թե ինչու են այս բրենդների ապրանքները տեղադրված ամենագրավիչ ու ճիշտ վայրերում:
