Դու և նա. Stop! Մուտքն արգելված էCosmo.am-ը գրում է․

Երբեմն, երբ սիրային հարաբերությունները կանգնում են փակուղու առաջ կամ ավարտվում են բաժանությամբ, մենք սկսում ենք գիտակցել, որ մի փոքր չափն անցել ենք, քանի որ բավականաչափ ազատություն չենք տվել մեր սիրելի տղամարդկանց և հաճախ, առանց գիտակցելու, խախտել ենք նրանց՝ անձնական կյանք ու անձնական տարածք ունենալու իրավունքը:

Ամերիկացի հոգեբան Հենրի Քլաուդը, օրինակ, այս երևույթին տալիս է հետաքրքիր սահմանում. «Կա մի կետ, որտեղ «ես»-ն առանձնանում է մնացած բոլորից»: Այդ կետն այն սահմանն է, որից այնկողմ տվյալ մարդը չի ցանկանում իր կյանքը բացել որևէ մեկի առաջ, անգամ՝ ամենասիրելի անձնավորության: Այդ սահմանների առկայությունը կարևորում են հատկապես արական սեռի ներկայացուցիչները. չէ՞ որ ամեն անգամ, երբ մենք հատում ենք այդ սահմանը, անուղղակի կերպով «ոտնձգություն» ենք կատարում նրա ազատության նկատմամբ: 
Այդ սահմաններն ընդունելը դառնում է ավելի դժվար, երբ այդ ամենին խառնվում են սերն ու զգացմունքները: Ասում են, որ կանոններն ու սահմանափակումները խախտելու համար են, բայց՝ ոչ սիրային հարաբերությունների դեպքում:

Ի՞նչ անել, որպեսզի քո սերը, հոգատարությունն ու նրա անձի նկատմամբ ունեցած հետաքրքրությունը ոչ մի կերպ չանցնեն սիրելի տղամարդուդ անձնական սահմանները: 

Ինչպես նշում է Cosmo հոգեբան Տաթևիկ Աղաբեկյանը, անձնական տարածքը միայն խոսելիս դիմացինի հետ որոշակի հեռավորություն պահպանելը չէ: Անձնական տարածքի մեջ են մտնում բոլոր այն իրերը և երևույթները, որոնք թանկ են մարդու համար, քանի որ այն ամենը, ինչը կարևոր է մեզ համար, կազմում է մեր «ֆիզիկական ես»-ի, մեր մարմնի և մեր ինքնության բաղկացուցիչ մասը: Հետևաբար, եթե դու որևէ կերպ փոփոխում ես դրանք, կամ եթե տվյալ մարդը ստիպված է լինում այդ երևույթները կիսել մեկ ուրիշի հետ, վերջինիս մոտ առաջանում է դրանք պաշտպանելու ցանկություն: Ավելին՝ կարող է տպավորություն առաջանալ, որ իր անձի որոշ մասը պոկում-տանում են իրենից, հետևաբար՝ անգամ եթե լուրջ ռոմանտիկ հարաբերությունների մեջ ես, մի՛ մոռացիր հարգել զուգընկերոջդ և նրա համար կարևոր երևույթները: Յուրաքանչյուր մարդ միշտ ցանկանում է ունենալ մի բան, որը միայն իրեն է պատկանում, լինի դա վայր, թե որևէ իր: 
Իսկ հիմա կետ առ կետ ուսումնասիրենք իրավիճակներն ու միասին գտնենք լուծման ճիշտ տարբերակներ:

Նրա ընկերները: Հարաբերությունների որոշակի փուլում, բնական է, որ դու, ծանոթանալով նրա ընկերների հետ, աստիճանաբար մտերմանում ես նրանցից մի քանիսի կամ, գուցե, բոլորի հետ: Թույլ մի՛ տուր, որ սիրելիդ կարծի, թե ինքն այլևս չի կարող իր ընկերներից որևէ մեկի հետ կիսվել որևէ փոքր գաղտնիքով: Նա պետք է ունենա ընկերներ, ում պարտադիր չէ, որ դու ճանաչես: Այդպես նա իրեն ազատ կզգա:

Նրա հանգիստը: Զույգերն առանձին չեն գնում հանգստանալու, առանձին չեն մասնակցում հավաքույթների ու, ընդհանրապես, նրանք ոչինչ առանձին չեն անում: Խնդիրն այն է, որ մեզ շատ հաճախ թվում է, որ եթե մեր սիրելիները մեր կողքին չեն, ապա միանշանակ դավաճանում են մեզ: Մինչդեռ պետք է վստահես նրան, և ոչ մի արտասովոր բան չկա, եթե քո ընտրյալը որոշի մենակ գնալ հանգստանալու: Հանգստի վերջին շաբաթվա ընթացքում կարող ես միանալ նրան: Նրան միայնակ հանգստանալու հնարավորություն տալով` դու միայն կշահես. նա կհասկանա, որ վստահում ես իրեն։ Բացի այդ, դու էլ ժամանակ կունենաս քո կարիքները հոգալու:

Նրա իրերը: Միասին ապրելու ժամանակ կարևոր է, որ յուրաքանչյուրդ ունենա սեփական տարածք` անձնական իրերի, հագուստի, աշխատելու կամ հոբբիով զբաղվելու համար: Նա պետք է ունենա դարակ, որի մեջ կարող է նետել իր կրակայրիչն ու նոթատետրը, կամ վստահ լինել, որ մի քանի օր առաջ իր գրպանից ընկած թղթի կտորը կգտնի հենց այնտեղից: Նա պետք է ունենա իր անկյունը, որտեղ կարող է հանգիստ աշխատել իր համակարգչով կամ պարզապես խաղ խաղալ ու ֆիլմ դիտել:

Նրա նամակագրությունը: Բնավ պարտադիր չէ ունենալ սոցիալական կայքերի նրա բոլոր էջերի ու էլեկտրոնային փոստերի գաղտնաբառերը: Օրվա մեջ մի քանի անգամ նրա էջերը մուտք գործելը լավ բանի, հավատա, չի բերի: Արդյունքում՝ դու միանշանակ կգտնես մի աղջկա, ով փորձում է գրավել սիրելիիդ, կգտնես սիրելիիդ կողմից ուղարկված նամակներ, որտեղ նա հաճոյախոսում է իր գործընկերուհիներից մեկին ու անպայման մտերիմ ընկերոջ հետ նամակագրություն, որի բովանդակությունը քեզ այնքան էլ պարզ չի լինի ու այդ պատճառով շատ կասկածելի կթվա: Իրոք որ, նրա հետ վիճելու առիթներ կստեղծվեն: Չնայած, եթե անկեղծ լինենք, մեր նամակագրություններն էլ միշտ չէ, որ բոլորովին անմեղ են լինում:

Նրա անձը: Կարիք չկա նրան կես ժամը մեկ հիշեցնելու, որ հաց ուտի, որ տաք հագնվի, որ զգույշ վարի մեքենան: Նա քո սիրելին է, այլ ոչ թե երեխան և բավական մեծ է՝ ինքնուրույն գործելու համար: Երբեք չփորձես նրա համար մայրիկ դառնալ: Դա միայն կվնասի ձեր հարաբերությունները: Պետք է տալ նրան ինքնուրույն գործելու և ինքնուրույն որոշում կայացնելու ազատություն:

Ի՞նչ է ստացվում: Անգամ եթե նա խենթի պես սիրահարված է քեզ, ու դուք աշխատանքից միշտ միասին եք տուն վերադառնում, ձեզանից յուրաքանչյուրը պետք է ունենա միայն իրեն հատկացված ժամանակը: Առանձին անցկացված երեկոն կստիպի, որ կարոտեք միմյանց: Կարիք չկա, որ դու վայրկյանը մեկ ստիպես նրան պատմել, թե ինչ խնդիրներ ունի աշխատավայրում. դա էլ է նրա անձնական «տիրույթը»: Հավատա, նա ինքը կկիսվի քեզ հետ, երբ դրա կարիքն ունենա: Տղամարդը պետք է հասկանա, որ դուք միասին եք, բայց միևնույն ժամանակ ինքը չի կորցնում իր ազատությունը:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել