Մարիամ Մելիքյանը՝ նոր խանդոտ կերպարի և առաջիկա հարսանիքի մասին

«Yere 1» հումորային նախագծից և սերիալներից հանրությանը հայտնի դարձած դերասանուհի Մարիամ Մելիքյանը նկարահանվում է նոր  «Ֆուլ հաուս» սիթքոմում, որտեղ  մարմնավորում է միանգամայն նոր կերպար:  Life.panorama.am-ը նրա հետ զրուցել է նոր դերի,  կարգավիճակում գրանցվելիք փոփոխության  և այլ թեմաների շուրջ:

-Նոր սիթքոմում ձեր կերտած կերպարն ինչպիսի՞ն է, ինչո՞վ է այն տարբերվում  «Yere1»-ի քարտուղարուհուց:

-Խաղում եմ խանդոտ, նույնիսկ՝ «խանդի հիվանդ», շահամոլ աղջկա: Յանան, ի տարբերություն նախորդ կերպարի, ավելի «թեթև» է, միաժամանակ՝ միամիտ, ով կարող է խաբվել անգամ փոքրիկ զարդով:

-Մոդելային ոլորտում այժմ  ի՞նչ աշխատանքներ եք տանում:

-Մոդելի աշխատանքով բացարձակ չեմ զբաղվում, նախ՝ որովհետև չեմ հասցնում, բացի այդ՝ հասկացա, որ ինձ հոգեհարազատ է դերասանուհու գործը:

-Սա ժամանակավոր, թե՞ մշտական դադար է:

 -Որոշել եմ, առհասարակ, դադարեցնել մոդելային կարիերան. այդ ոլորտը Հայաստանում այնքան էլ զարգացած չէ, ուստի ինձ համար աշխատանքն էլ հետաքրքիր չէ:

-Գուցե ձեր համարձակ կերպարի շուրջ հնչած քննադատություննե՞րը ստիպեցին հանգել այդ որոշմանը, կամ՝ ձեր նշանա՞ծն է խոչընդոտ հանդիսացել:

-Ես քննադատություններից չեմ վախենում, ինձ համար կարևոր է հանդիսատեսի կարծիքը: Ոչ էլ նշանածս է խոչընդոտել. խանդն այնպիսի բան է, որի առկայության դեպքում ինձ կարգելվեր զբաղվել նաև դերասանությամբ, բայց նման բան չկա: Մենք ունենք փոխադարձ վստահություն, ուստի իմ առջև արգելքներ չկան: Պարզապես հիմա կենտրոնացել եմ դերասանական աշխատանքի վրա:

-Հարցազրույցներից մեկի ժամանակ նշել էիք, որ հնարավոր է՝ մասնակցեք գեղեցկության միջազգային մրցույթների. հետաքրքիր առաջարկներ եղե՞լ են:

-Առաջարկներ ստացել եմ, բայց, քանի որ այդ ընթացքում սիթքոմով էի զբաղված, չհասցրեցի համատեղել: Հիմա առաջարկներ դեռ չկան, այնպես որ, չեմ կարող ասել, թե առաջիկայում ինչ կլինի:

-Երկար տարիներ զբաղվել եք պրոֆեսիոնալ պարով, այժմ դրա համար ժամանակ մնու՞մ է:

-Պարով զբաղվում եմ, արդեն, սիրողական մակարդակով՝ կեցվածքս պահպանելու նպատակով: Պրոֆեսիոնալ պարը թողել եմ՝ ժամանակի սղության պատճառով:

-Առաջիկայում ամուսնության հետ կապված պլաններ կա՞ն:

-Այո, հոկտեմբերի 19-ին կլինի իմ հարսանիքը: