Վարչապետ Հովիկ Աբրահամյանն այսօր «Նաիրիտ» գործարանի աշխատողների հետ հանդիպմանն ասել է, որ երկու ամիս է` չենք կարողանում պարզել, թե ով է «Նաիրիտի» սեփականատերը: Վարչապետը ստում է, եթե նույնիսկ մինչեւ հիմա չգիտի, թող «Հետքի» հետաքննությունների բաժնում կարդա «Նաիրիտի» մասին հոդվածները եւ իմանա սեփականատիրոջ անունը եւ բազմաթիվ այլ օգտակար տեղեկություններ: Եթե ուզում է ավելին իմանալ, թող դիմի գլխավոր դատախազին, որ կալանավորեն նախագահի խորհրդական Արմեն Մովսիսյանին եւ Միջպետական բանկի Հայաաստանի ներկայացուցիչ Վահան Մելքոնյանին: Վարչապետը եթե ուզում է, որ բացի իրենից հանրությունն էլ իմանա, թե ինչ է կատարվել «Նաիրիտի» հետ, թող Հանրային հեռուստատեսությամբ «Հետաքննող լրագրողներին» տրամադրի մեկ ժամ եթեր, որ հանրությանը տեղեկացնենք այդ հանցագործությունների մասին, որոնք կատարել են պաշտոնյաները եւ մնացել անպատիժ: «Նաիրիտի» մասին նյութերը հավաքված են նաեւ ոստիկանության քննչական գլխավոր վարչությունում, որը գործը կարճել է, եւ Վլադիմիր Գասպարյանն այդպիսով դարձել է նաեւ հանցակից «Նաիրիտի» մախինացիաներին: Հովիկ Աբրահամյանը քրեական գործերի նյութերը կարող է վերցնել ու ծանոթանալ: Այնպես որ, հերթական անգամ մի խաբեք ժողովրդին:
