1in.am-ը գրում է.
Դեսպանների մակարդակով ԵՄ խորհուրդն այսօր կգնահատի Ռուսաստանի կողմից Ուկրաինայի արևելքում իրավիճակի լիցքաթափմանն ուղղված ԵՄ 4 պահանջների կատարումը: Այս մասին ITAR-TASS-ին հայտնել է ԵՄ արտաքին քաղաքականության և անվտանգության հարցերով գերագույն ներկայացուցչի մամլո քարտուղար Մայա Կոսյանչիչը:
«Զուգահեռաբար կշարունակվեն հակամարտության լիցքաթափման ջանքերը»,- հայտարարել է նա:
ԵՄ գագաթնաժողովը հունիսի 27-ին՝ Ուկրաինայի հետ Ասոցացման համաձայնագրի ստորագրումից հետո, ձևակերպել էր Ռուսաստանի հանդեպ 4 պահանջ՝ խոստանալով մինչև հունիսի 30-ի օրվա վերջ դրանց չկատարման դեպքում քննարկել նոր պատժամիջոցների սահմանման հնարավորությունը:
ԵՄ-ն առաջին հերթին պահանջել է ստեղծել հրադադարի ռեժիմի պահպանման մոնիտորինգի և ԵԱՀԿ առաքելության հսկողության ներքո սահմանի արդյունավետ վերահսկման մեխանիզմ, կառավարական զորքերին վերադարձնել սահմանային անցակետերը, ազատել բոլոր պատանդներին, գործարկել համապարփակ բանակցություններ՝ Պորոշենկոյի խաղաղ ծրագիրը կյանքի կոչելու համար:
Հակառակ դեպքում ԵՄ-ն պատրաստ է ցանկացած պահի հավաքվել՝ քննարկելու հետագա պատժամիջոցները:
Բրյուսելի դիվանագիտական աղբյուրը հայտնել է, որ Ռուսաստանի դեմ ոլորտային հնարավոր պատժամիջոցների փաթեթը պատրաստվել է Եվրահանձնաժողովի և ԵՄ արտաքին քաղաքական ծառայության կողմից դեռևս մայիսին: Այն մասնավորապես ներառում է նավթի և գազի արդյունահանման համար սարքավորումների ու տեխնոլոգիաների մատակարարումը սահմանափակելու առաջարկ:
