Azatutyun.am-ը գրում է.
Հետկանչից մոտ երկուս ու կես ամիս անց օրերս Երևան վերադարձած Հայաստանում Ուկրաինայի դեսպան Իվան Կուխտայի խոսքով, Կիևը մտադիր է խորացնել իր հարաբերությունները Երևանի հետ:
Այսպիսի հայտարարություն դեսպան Կուխտան արեց այսօր «Ազատության» հետ զրույցում՝ հավելելով, որ անցած տարի երկկողմ առևտրաշրջանառությունը կազմել է մոտ 230 միլիոն ԱՄՆ դոլար, որից 197 միլիոնը ուկրաինական արտահանումն է Հայաստան:
Հիշեցնենք, Ղրիմի հարցում Հայաստանի իշխանությունների՝ Կրեմլին համահունչ դիրքորոշման հրապարակայնացումից հետո՝ մարտի 21-ին, Իվան Կուխտա հետ էր կանչվել Կիև:
«Ուկրաինան ու Հայաստանը միշտ ունեցել են լավ հարաբերություններ, այժմ էլ ունեն և ապագայում նույնպես կունենան նման հարաբերություններ: Երկամսյա խորհրդակցություններից հետո, ցանկանում եմ նշել՝ երախտապարտ ենք, որ մայիսի 25-ին Ուկրաինայում տեղի ունեցած ընտրություններից հետո, Հայաստանը առաջին երկրներից էր, որ ճանաչեց այդ ընտրությունները: Նախագահ Սարգսյանը շնորհավորեց Ուկրաինայի նորընտիր նախագահ Պորոշենկոյին՝ այդպիսով դիրքորոշում հայտնելով, որ Հայաստանը ճանաչում է մայիսի 25-ին Ուկրաինայում տեղի ունեցած նախագահական ընտրությունները: Սա շատ բարյացակամ, լավ դիվանագիտական քայլ էր: Ուստի, Ուկրաինայի դեսպանը վերադարձավ [Երևան]՝ իր պարտականությունների կատարմանը»,- ասաց դեսպանը։
Իվան Կուխտան փոխանցեց, որ արդեն հանդիպել է Հայաստանի արտգործնախարար Էդվարդ Նալբանդյանի հետ, և երկխոսության ընթացքում ամրագրվել է՝ Երևանն ու Կիևը շահագրգռված են երկկողմ հարաբերությունները զարգացմամբ:
«Ցանկանում եմ ավելին ասել, Ուկրաինան պաշտոնական հրավեր է ուղարկել Հայաստանի ղեկավարությանը՝ մասնակցելու նորընտիր նախագահի երդմնակալության արարողությանը, որը տեղի կունենա հունիսի 7-ին Կիևում: Իմ տվյալներով, հայկական կողմը պատրաստ է ներկայացուցիչ ուղարկել»,- ասաց դեսպանը:
Մարտի 27-ին ՄԱԿ-ի Գլխավոր ասամբլեայում Հայաստանն, ինչպես հայտնի է, դեմ քվեարկեց ներկայացված բանաձևին, որը ճանաչում է Ուկրաինայի տարածքային ամբողջականությունն ու անօրինական համարում Ղրիմում մարտի 16-ին անցկացված հանրաքվեն։ Մեր երկիրը՝ Բելառուսի, Սուդանի, Սիրիայի, Հյուսիսային Կորեայի ու Զիմբաբվեի հետ այն 11 պետությունների շարքում էր, որոնք այդպես քվեարկեցին Մոսկվայի տեսանկյունից անընդունելի հանդիսացող այդ բանաձևին:
Ամբողջական հոդվածը կարող եք կարդալ այստեղ
