Panorama.am-ը գրում է.
ՀՀ ԱԺ նախագահ, Միջխորհրդարանական միությունում ԱԺ պատվիրակության ղեկավար Հովիկ Աբրահամյանի գլխավորած պատվիրակությունը մարտի 17-ին Ժնևում մասնակցել է Միջխորհրդարանական միության 130-րդ վեհաժողովի աշխատանքներին: Այս մասին տեղեկացնում է ԱԺ լրատվական ծառայությունը:
Միջխորհրդարանական միության ղեկավար խորհրդի նիստից հետո աշխատանքները սկսել է Միջխորհրդարանական միության 130-րդ վեհաժողովը, որին մասնակցել են շուրջ 150 երկրների խորհրդարանական պատվիրակություններ:
Ելույթով հանդես է եկել ՀՀ ԱԺ նախագահ Հովիկ Աբրահամյանը: Ներկայացնում ենք ելույթն ամբողջությամբ.
«Խոսքս ցանկանում եմ սկսել՝ շնորհավորելով մեզ բոլորիս հիշարժան տարեդարձի առթիվ: Այս տարի լրանում է Միջխորհրդարանական միության ստեղծման 125-ամյակը՝ կազմակերպություն, որն իր գոյության առաջին իսկ օրվանից հավատարիմ է իր իսկ հռչակած սկզբունքներին՝ խաղաղություն, հարգանք մարդու իրավունքների նկատմամբ և ժողովրդավարություն: Սրանք այն գաղափարներն են, որոնք մշտապես գտնվել ու գտնվում են Միջխորհրդարանական միության ուշադրության կենտրոնում և դարձել են նրա հիմնասյուները:
1997թ. ընդունված «Ժողովրդավարության մասին» համընդհանուր հռչակագրում ասվում է. «ժողովրդավարացման գործընթացն ու ներկայացուցչական հաստատությունները խաղաղության և ժողովրդավարության հաստատման լավագույն միջոցներն են: Միջխորհրդարանական միությունը խթանում է համայն աշխարհում ներկայացուցչական կառավարման բազմակարծ համակարգերի հաստատումը»:
Միջխորհրդարանական միության գործունեության մեջ առանձնահատուկ տեղ ունեն հասարակության ամենախոցելի շերտերի՝ կանանց ու երեխաների հիմնախնդիրները, մասնավորապես, պատերազմի և հակամարտությունների ժամանակ, միգրանտների, բնապահպանական և բազմաթիվ այլ գլոբալ հարցերին նվիրված քննարկումները: Միջխորհրդարանական միությունն այն եզակի կազմակերպություններից է, որը զբաղվում է նաև պատգամավորների իրավունքների պաշտպանությամբ և հատուկ այդ նպատակով ստեղծել է առանձին հանձնաժողով:
Ամբողջական հոդվածը կարող եք կարդալ այստեղ
