Հարց`
Հարգելի բժիշկ, ունեցել եմ անպաշտպան պատահական սեռական կապ, ինչպե՞ս անել, որ խուսափեմ սեռական ինֆեկցիաներով վարակվելուց: Կա՞ն արդյոք կանխարգելիչ միջոցներ:
Հարցին պատասխանում է բժիշկ-սեքսոպաթոլոգ, դոցենտ, ԵՊԲՀ սեքսոպաթոլոգիայի ամբիոնի վարիչ, սեքսոպաթոլոգիայի համալսարանական կլինիկայի ղեկավար Սևադա Հակոբյանը.
Պետք է ասել, որ թեկուզ մեկ սեռական հարաբերությունն առանց պահպանակի կարող է սեռական օրգանների բորբոքային հիվանդությունների պատճառ հանդիսանալ, եթե զուգընկերոջ կամ զուգընկերուհու մոտ առկա է սեռական ճանապարհով փոխանցվող ինֆեկցիաներով պայմանավորված ախտահարում: Այս դեպքում որոշ մարդիկ կարճատև (մեկանգամյա) անտիբակտերիալ դեղորայք են օգտագործում (ինքնաբուժություն), ինչը չի խրախուսվում, քանի որ հանգեցնում է ինֆեկցիայի դեղորայքակայունության առաջացման, ինչպես նաև պրոցեսի քողարկման: Անտիսեպտիկ լուծույթների կիրառումը, միզարձակությունը անմիջապես սեռական ակտից հետո, կարող են որոշակի կանխարգելիչ դեր ունենալ, սակայն պարտադիր են համարվում համապատասխան հետազոտությունները՝ բորբոքային պրոցեսի վաղ հայտնաբերման և բուժման համար:
