Վաշինգտոնը խոստովանում է, որ Հյուսիսային Կորեայի և Հարավային Կորեայի միջև ռազմական գործողություններ կարող են տեղի ունենալ «առաջիկա ամիսներին»։ Այսպիսի հայտարարություն է արել ամերիկյան The New York Times թերթը՝ վկայակոչելով ԱՄՆ վարչակազմի պաշտոնյաներին։
Ըստ նրանց, Հյուսիսային Կորեայի առաջնորդ Կիմ Չեն Ընը, իբր, «կարող է ռազմական գործողություններ ձեռնարկել Հարավային Կորեայի դեմ առաջիկա ամիսներին»՝ Սեուլի նկատմամբ ավելի ու ավելի թշնամական հռետորաբանության անցման պայմաններում: Վաշինգտոնում Հյուսիսային Կորեայի առաջնորդի գործողությունների վերլուծությունը ցույց է տալիս, որ նրա հայտարարություններին «պետք է լուրջ վերաբերվել»։ Միևնույն ժամանակ, ամերիկացի փորձագետները «մոտ ապագայում Կորեական թերակղզում լայնամասշտաբ ռազմական հակամարտության բռնկման հստակ ռիսկ չեն տեսնում»։
Ավելի վաղ, ԿԺԴՀ-ին սահմանակից հարավկորեական շրջանների մի շարք բնակիչներ և ակտիվիստներ Սեուլում օտարերկրյա լրագրողների հետ հանդիպման ժամանակ մտահոգություն էին հայտնել Հարավային Կորեայի և ԿԺԴՀ-ի միջև հարաբերություններում աճող լարվածության կապակցությամբ: Նրանք նաև կոչ են արել արգելել միջսահմանային թռուցիկների տարածումը և վերադառնալ միջկորեական համաձայնագրին՝ լարվածությունը նվազեցնելու համար: Հարավկորեացի մի շարք հետազոտողների կարծիքով՝ ռազմական ոլորտում համաձայնագրից հրաժարվելու պատճառով ավելացել է ոչ միտումնավոր բախումների վտանգը։
Կորեայի կենտրոնական լրատվական գործակալությունը (KCNA) հունվարի 19-ին հաղորդել է, որ Փհենյանը փորձարկել է Haeil-5-23 ստորջրյա միջուկային համակարգը՝ ի պատասխան ԱՄՆ-ի, Հարավային Կորեայի և Ճապոնիայի վարժանքների: Նախկինում ԿԺԴՀ-ն արդեն փորձարկել է Haeil տիպի սարքերը։ Նման փորձարկումներից հետո «Կորեայի ձայնը» պետական ռադիոն հայտնել է, որ զենքը կարող է «ռադիոակտիվ ցունամի» ստեղծել՝ թշնամու նավերի խմբերն ու նավահանգիստները ոչնչացնելու համար: Փհենյանում ԱՄՆ-Հարավային Կորեա զորավարժությունները համարվում են «պատերազմի փորձ» ԿԺԴՀ-ի հետ։
