Tert.am-ը գրում է․
Վերջին օրերին մենք հետևում ենք Փաշինյանի արած հայտարարութոյւններին ԼՂ հարցի շուրջ: Նրա վերջին հայտարարությունն այն էր, որ իբր 1994 թ-ից ԼՂ-ի շուրջ ընթացող բանակցությունները միտում են ունեցել Արցախը թողնել Ադրբեջանի կազմում: Իհարկե, այս հայտարարությունը Նիկոլ Փաշինյանի կողմից իր մեղքերը քավելու, իր սխալներն արդարացնելու նոր դրսևորում է: Ղարաբաղի կորստից հետո, նույնիսկ պատերազմից հետո ինքը մտել էր այս գործընթացի մեջ՝ արդարացման, որ առավել խորացրել է մեր խնդիրները, և այսօր այդ արդարացման գործընթացը բոլորովին նոր դրսևորում է ստացել, և Փաշինյանն իր առաջ խնդիր է դրել այս հարցը բերել ընդհանուր արդեն հանգուցալուծմանը: Այս մասին տեսանյութում ասել է ՀՀ նախկին արտգործնախարար Վարդան Օսկանյանը:
«Ինչքան միջազգային հանրությունն ավելի հաճախ է խոսում ԼՂ հարցի շուրջ, այնքան Փաշինյանի մոտ կարծես սրվում են այս արդարացման դրսևորումները: Դրանք, կարծես, Փաշինյանին հանգիստ չեն տալիս, որովհետև նա ուզում է այս հարցը փակի: Եվ այդ ճանապարհին նա վերջերս մարտահրավեր նետեց նախկին նախագահներին՝ հանրային բանավեճի մեջ մտնել իր հետ: Նախագահները մերժել են այդ հրավերը:
Ես 1992թվականից եղել եմ ԼՂ-ի բանակցությունների առաջին գծում, սկզբում որպես շարքային դիվանագետ, հետո ինձ վրա պարտականություն է դրվել բանակցությունները վարել: Այնուհետև 1994 թվականին նշանակվել եմ ԱԳ փոխնախարար և շարունակել եմ լինել գլխավոր բանագնաց, այնուհետև եղել եմ ԱԳ նախարար, վարել եմ այդ բանակցությունները: 2008-ին հասցրել եմ բանակցային իր գագաթնակետին և ստացել ենք Մադրիդյան սկզբունքների փաստաթուղթը, որտեղ առաջին անգամ լինելով՝ ամրագրվում է ԼՂ ժողովրդի ինքնորոշման իրավունքը և դա հաստատվում է միջազգային հանրության կողմից: Դա մեջ հաջողությունն էր:
Մինչ այդ մասնակցել եմ բոլոր փաստաթղթերին, կարող եմ վերարտադրել դրանք:
Հազվագյուտ մարդկանցից եմ, որ տիրապետել եմ ու շարունակում եմ տիրապետել ողջ գործընթացին: Այդ հանգամանքով պայմանավորված, ուզում եմ ասել հետևյալը. Փաշինյանը վերահաստատեց բանավեճն ունենալու իր ցանկությունը: Ես ուզում եմ ասել, որ թույլ չեմ տալու, որ նա շարունակի խաբել մեր ժողովրդին: Ես կարող եմ հակադրվել Փաշինյանին և կարող եմ ապացուցել, որ նա խաբում է:
Ես ձեռնոց եմ նետում Փաշինյանին և ասում, որ արի, մենք հանրային բանավեճ ունենանք, և ես քեզ ապացուցեմ, որ դու սխալ ես: Բայց միայն մեկ պայմանով, որ այդ բանավեճը պարտվելուց հետո Փաշինյանը կխոստանա մեր ժողովրդին, որ կփոխի իր քաղաքականությունը ԼՂ հարցում և բանակցային օրակարգ կբերի ԼՂ ժողովրդի՝ իրենց հայրենիք վերադառնալու հարցը»,- ասել է Օսկանյանը:
