Սոցցանցերում տեսանյութեր են հրապարակվում, որոնք ներկայացնում են Բելգորոդի նավթի պահեստում պայթյունների պահը։ Կադրերում երևում է, թե ինչպես են կրակակետերը օդից թռչում ներքև, որից հետո պայթյուններ են որոտում։
Հիշեցնենք, որ ռուս-ուկրաինական սահմանին մոտ գտնվող Բելգորոդ քաղաքի նավթի պահեստում հրդեհ է բռնկվել։ Պատճառն ուկրաինական զինուժի կողմից իրականացված ավիահարվածներն են։ Այս մասին հայտնել է Բելգորոդի շրջանի նահանգապետ Վյաչեսլավ Գլադկովը։
Ավելի ուշ Գլադկովը հայտնել է, որ հրդեհը պայմանավորված է Ուկրաինայի զինված ուժերի ավիահարվածով։ Նրա խոսքով՝ ուկրաինական զինուժի երկու ուղղաթիռ է ներխուժել Ռուսաստանի տարածք։
«Նավթի պահեստում հրդեհը բռնկվել է ցածր բարձրության վրա Ռուսաստանի տարածք ներխուժած Ուկրաինայի զինված ուժերի երկու ուղղաթիռից իրականացված ավիահարվածի հետևանքով։ Զոհեր չկան»,- գրել է նա։
Բելգորոդի նավթի պահեստում արդեն ութ նավթամբար է այրվում։
