Armenpress.am-ը գրում է.
Հայաստանի պարի պետական անսամբլը Վ.Ա.Ֆանարջյանի անվան ուռուցքաբանության ազգային կենտրոնի հետ համատեղ նախաձեռնել էր բարեգործական համերգային ծրագիր` նվիրված քաղցկեղով հիվանդ երեխաներին: Համերգի ողջ հասույթը կտրամադրվի քաղցկեղով հիվանդ երեխաների «City of smile» բարեգործական հիմնադրամին: Արդեն իսկ հավաքագրվել է 10 մլն ՀՀ դրամ:
Միջոցառմանը ներկա էին ՀՀ վարչապետի պաշտոնակատար Նիկոլ Փաշինյանի տիկին Աննա Հակոբյանը, ով նաև հիմնադրամի հոգաբարձուների նախագահն է, ինչպես նաև ՀՀ նախագահ Արմեն Սարգսյանի տիկին Նունե Սարգսյանը:
«Մեր հիմնադրամի բացման օրից ի վեր հավաքված հասույթը վկայում է, որ մարդիկ անմասն չեն մնում: Մայիս ամսից սկսած արդեն, իսկ հավաքվել է 500 հազար ԱՄՆ դոլար գումար»,- ընդգծեց Աննա Հակոբյանը:
Հայաստանի պարի պետական անսամբլի ղեկավար Էրիկ Չանչուրյանը նշեց, որ իրենք բարեգործական համերգներով հանդես են գալիս նաև ՀՀ գյուղերում և քաղաքներում:
Համերգային ծրագրի իրականացմանն աջակցել են Յոլյանի անվան արյունաբանության կենտրոնը, Վ. Ա. Ֆանարջյանի անվան ուռուցքաբանության ազգային կենտրոնը և ՀՀ մշակույթի նախարարությունը:
