Ցանկացած պայքարում կարելի է հաղթել և պարտվել: Արդյունքը հատկապես անկանխատեսելի է, երբ խոսքը գնում է ավելորդ քաշի դեմ պայքարի մասին:

Հետևյալ սխալները ոչ մի կերպ չի կարելի թույլ տալ, երբ նիհարում ես:

Քիչ կալորիականությամբ դիետաներ և սովամահություն

Կալորիաների կտրուկ կրճատումը հանգեցնում է ոչ միայն քաշի նվազեցմանը, այլև առողջական խնդիրների: Բժիշկները բացատրում են, որ քաշի կորուստը միշտ չի, որ նշանակում է ճարպային հյուսվածքների կորուստ: Քաշը ցուցիչ է, որ կազմվում է կմախքի, ներքին օրգանների, մկանների, սննդի, ջրի, ինչպես նաև ճարպի ընդհանուր զանգվածից: Եվ հետո, որոշ ժամանակ հացադուլ անելուց հետո ամենայն հավանականությամբ կվերադառնաս քո նախկին քաշին:

Հյուծող սպորտային մարզումներ

Տանջամահ անող մարզումները դժվար լավ արդյունքի հանգեցնեն: Դրանք կարող են հանգեցնել ջրազրկման և լուրջ վնասվածքների: Ավելի լավ է մարզումներին տրամադրել օրական 30-40 րոպե: Չէ՞ որ ավելորդ քաշի դեմ պայքարի գլխավոր պայմանն ամենօրյա և տանելի ֆիզիկական ծանրաբեռնվածությունն է:

Ծխել

Չնայած բժիշկների զգուշացումներին, մարդիկ մինչև այսօր չեն կարողանում հրաժարվել այս վնասակար սովորությունից: Նիկոտինն իսկապես ճնշում է ախորժակը, բայց այստեղ դրա ենթադրյալ առավելությունները վերջանում են: Կարող ենք անգամ չթվարկել այն օրգան-համակարգերը, որոնց վրա ծխախոտը մահացու ազդեցություն է թողնում: Արդյո՞ք ցանկանում ես առողջությանդ հաշվին նիհարել:

Նիհարեցնող հաբեր և հրաշագործ դեղամիջոցներ

Մի՞թե հնարավոր է հավատալ, որ դեղատանը վաճառվող հաբերն իսկապես կարող են նիհարեցնել: Այո, դրանք օգնում են, բայց միայն արտադրողներին և նրանց գրպաններին: Հիմնականում նման հաբերն ունեն միզամուղ հատկություններ և պարունակում են կոֆեին: Լավագույն դեպքում ամեն ինչ ավարտվում է ջրազրկմամբ, վատագույն դեպքում` առողջական լուրջ խնդիրներով:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել