Մասնագիտությամբ իրավաբան-իրավագետ և երկար տարիներ ոստիկանության համակարգի ծանր պատասխանատվությունն իր ուսերին կրող Լևոն Խաչատրյանը դեռ տարիներ առաջ էր հետաքրքրություն ցուցաբերել ֆիլմարտադրության, հատկապես սցենարային աշխատանքների նկատմամբ: Եվ ահա այսօր իր հոբբիին լրջության շունչ տալով նա իրականացրեց հեղինակային երրորդ ֆիլմի սցենարը : Արդեն իսկ սպասված և մեծ աղմուկ հանած ֆիլմի , իր և Գոռ Վարդանյանի փոխհարաբերությունների, ԱՄՆ-ում նրանց մութ ու գաղտնի գործունեության իսկությունը պարզաբանելու համար , ներկայացնում ենք բացառիկ հարցազրույց: Թե ինչպես միտք հղացավ զբաղվել այդ պատասխանատու գործով, ինչը նրան ստիպեց լրջորեն մտածել այդ ոլորտում ձեռագիր թողնելու մասին, և թե ինչպես զարգացան նրա հարաբերությունները ֆիլմ ստեղծողների հետ, զրույցում մանրամասնեց հենց ինքը ` Լևոն Խաչատրյանը:
-Բազմիցս նշել եք, որ ավարտել եք Ոստիկանության Ակադեմիան, երկար տարիներ աշխատել եք քրեակատարողական հիմնարկներում, այնուհետև ոստիկանությունում` ընդհուպ մինչև «Թմրաբիզնեսի դեմ պայքարի վարչության» պետ : Որքանով է նպաստել ձեր անցած ուղին ֆիլմի սցենարներ գրելուն, և ինչ եք կարծում, Ձեզ հետագայում տեսնում եք այդ ասպարեզում?
- Այո, ես ավարտել եմ Ոստիկանության ակադեմիան և ստացել եմ իրավաբան – իրավագետի որակավորում: Աշխատել եմ քրեակատարողական վարչությունում` օպեր-լիազոր, այնուհետև 2004 թ-ին տեղափոխվել եմ ՀՀ ոստիկանություն, և մինչ 2012 թ. աշխատել եմ ոստիկանությունում, զբաղեցրել եմ «Թմրաբիզնեսի դեմ պայքարի վարչության» պետի պաշտոնը: Օպերատիվ աշխատանքը բավականին հետաքրքիր, բարդ և ստեղծարար աշխատանք է, և յուրաքանչյուր օպերատիվ աշխատող ինքնին արդեն իսկ սցենարիստ է, պետք է միայն կարողանալ համակարգել մտքերը և համապատասխանեցնել ֆիլմ արտադրողի պահանջներին: Չեմ հերքում, որ իմ անցած ճանապարհը բավականին մեծ ազդեցություն է ունեցել սցենարներ գրելու որոշման վրա և կարծես թե անավարտ մնացած գործերի ասելիքը տրվել է ֆիլմերի սցենարային լուծումներով: Միգուցե թմրաբիզնեսի դեմ պայքարի ընթացքում ականատես լինելով բազմաթիվ ողբերգական և մեր ազգային գենոֆոնդի համար կործանարար ազդեցություն ունեցող երևույթներին, չբավարարվելով միայն այն գործառույթներով, որոնք ես ունեի, փորձել եմ սցենարով ցույց տալ դրա վատ ազդեցությունն ու հետևանքները, և փորձել սթափեցնել ` ինչ որ տեղ նաև հասարակության ուշադրությունը հրավիրել խնդրի լրջության վրա: Ֆիլմը ինձ հնարավորություն է ընդձեռնել ազատ արտահայտելու իմ անհանգստությունները արծարծվող բազմաթիվ երևույթների նկատմամբ, իհարկե, թույլատրելիության սահմաններում: Չնայած նրան, որ մասնագիտությամբ իրավաբան եմ, բայց այն հոբբին , որը հիմա հասունացնում ու տարածում է իր արմատներն իմ մեջ` սկսել է լրջորոն հետաքրքրել ինձ և վստահ եմ՝ հետագայում էլ հանդես կգամ նորանոր պրոյեկտներով և այն հսկայական ինֆորմացիան, որ կուտակվել է այս տարիների ընթացքում, կարծում եմ կվերածվեն գեղարվեստական ֆիլմերի:
- «Ստվերները դրախտում»-ը որերորդ ֆիլմն է, որ համագործակցում եք Գոռ Վարդանյանի հետ?
- Գոռ Վարդանյանի հետ համատեղ սա մեր երրորդ ֆիլմն է, առաջինը բոլորին քաջ հայտնի «Վրիժառու» , իսկ երկրորդը «Revenger 2», նաև շուտով հանդիսատեսի դատին կհանձնենք երրորդը՝ « Ստվերները դրախտում» ֆիլմը, որի նկարահանումները իրականացվել են Լոս-Անջելոսում և Ֆրանսիայում: Համագործակցությունը եղել է Գոռ Վարդանյանի առաջարկությամբ: Երբ պատրաստվում էր նկարահանել «Վրիժառու» ֆիլմը մի քանի սցենարիստների հետ խորհրդակցելուց հետո, այդ պատասխանատու գործը վստահեց ինձ, և այդպես իրականացավ մեր առաջին համատեղ գաղափարը: Իհարկե, Գոռ Վարդանյանը այդ շրջանում ինձ բավականին օգնեց՝ փոխանցելով նաև սցենար գրելու և ֆիլմ նկարահանելու իր մեծ փորձը, քանի որ դա ինձ համար նոր ոլորտ էր և արդյունքում եղավ այն, որ ունեցանք իմ առաջին՝ «Վրիժառու» ֆիլմի սցենարը:
-«Վրիժառու» և «Revenger 2 »ֆիլմերը բավականին մեծ աղմուկ առաջացրեցին հանրության շրջանում, իսկ այդ աղմուկի պատճառը կրիմինալ և շատերի համոզմամբ ` ոչ այդքան իրականությունը պատկերող իրավիճակն էր , արդյո՞ք նոր ֆիլմը ևս սցենարային լուծումներով նման չի լինի նախորդ երկու ֆիլմերին:
- Գիտեք ասում են` հաճախ ճշմարտությունը ասելու պատճառը այն թաքցնելու անհնարինության մեջ է, և այն, որ ֆիլմերը մեծ աղմուկ են հանել և մեծ արձագանք են գտել` միայն ողջունելի փաստ է, և կարելի է նույնիսկ ասել, որ մեր ասելիքը հասցրել ենք տեղ, որի համար ևս ուրախ եմ, քանի որ, եթե այդ ֆիլմը դիտելու արդյունքում գոնե մեկ երիտասարդի ծնողները ուշադրություն դարձնեն իրենց երեխայի կենասակերպին և վարքագծին կամ մեկը գոնե որոշի հետ կանգնել սխալ ուղուց, կարող ենք արձանագրել հաղթանակ…բացի դա ֆիլմը վերաբերվում էր պետական պաշտոնյաներին, ԱԺ պատգամավորի, քրեական աշխարհի անձանց, բնական է, որ այն նման աղմուկ պետք է բարձրացներ: Ոչ, նոր ֆիլմը նման չի լինի նախորդներին…-
-Հեշտ է աշխատել Գոռ Վարդանյանի հետ, ՖԲ նկարներից էլ երևում է, որ մտերիմներ եք, ի՞նչ կապով է կապված ձեր մտերմությունը:
- Գոռ Վարդանյանին ճանաչում եմ 1994 թ-ից, երբ սկսեցի մարզվել Ֆուլ Կոնտակտ կարատեյով, և ասեմ, որ նա մինչ օրս հանդիսանում է իմ ուսուցիչը: 2000թ-ից հանդիսանում եմ Ֆուլլ Կոնտակտ կարատեյի ֆեդերացիայի փոխնախագահը, այնուհետև նաև գլխավոր մրցավարը, սև գոտի 4-րդ դան եմ: Ինչ վերաբերվում է այլ կապին, ասեմ, որ Գոռ Վարդանյանը հանդիսանում է իմ ընտանիքի կնքահայրը, փորձեմ մի փոքր փակագծերը բացել, նա իմ մկրտության, պսակադրության և երեխաներիս կնքահայրն է, և ես հպարտ եմ դրանով: Ցավալի է, որ մեր իրականության մեջ կան մարդկային երևույթներ, որոնք պլանավորված երեխա են լույս աշխարհ բերում այս ինչի հետ նոր «սուրբ» կապի հաստատման համար: Իսկ նրա հետ աշխատելն ինձ համար շատ հեշտ է և հաճելի, որովհետև ես հասկանում եմ այն ամենը, ինչ ինքն ուզում է տեսնել և ստանալ, նույնիսկ կարող եմ ասել, որ մենք երկուսով ունենք նույն սկզբունքներն ու դիրքորոշումը:
-Գոռ Վարդանյանի բոլոր ֆիլմերը դաստիարակչական միտում են ունեցել, որտեղ պայքար է մղվում բացասական երևույթների և չարի դեմ, բայց լուրեր են պտտվում, որ նա հովանավորում է գաղտնի քրեական խմբերին և որ ԱՄՆ-ում անօրինական գործունեությամբ է զբաղվում:
- Ես դա համարում եմ անհեթեթություն. Գոռ Վարդանյանը Ձեր այսպես ասած լուրերի հետ ոչ մի կապ չի կարող ունենալ մի պարզ պատճառով, նա սպա է, և շատ երկար տարիներ աշխատել է ոստիկանության համակարգում, Ազգային Անվտանգության համակարգում, եղել է Հայաստանի առաջին և երկրորդ նախագահների անվտանգության ծառայության աշխատակից, հիմնադրել է աշխարհում իր տեղն ու դիրքը ունեցող սպորտային կայուն կազմակերպություն՝ Դուքենդո Ֆուլլ Կոնտակտ կարատեյի ֆեդերացիան, իր բազմաթիվ սաներով, որոնցից շատ շատերն աշխատում են տարբեր իրավապահ համակարգերում, նրա գործունեությունը բավականին թափանցիկ է:
-Գոռ Վարդանյանի վերջին հարցազրույցից պարզ դարձավ, որ այս ֆիլմը նվիրված է վերջին 20-25 տարիներին ԱՄՆ-ում բնակություն հաստատած էմիգրանտ քրեական տարերին: Ի՞նչ կասեք այս մասին:
- Այո, ֆիլմը նվիրված է վերջին 20-25 տարիներին ԱՄՆ –ում բնակություն հաստատած Էմիգրանտներին, ոչ միայն հայ, այլև աշխարհի տարբեր անկյուններից Լոս-Անջելս տեղափոխված և բնակություն հաստատած մարդկանց: Չեմ ցանկանում հիմա բացել փակագծերը , պատմել ֆիլմի սյուժեն, բայց համոզված եմ, որ նկարահանել ենք հոլիվուդյան չափանիշներով ֆիլմ և համարձակություն ենք ունեցել ձեռնոց նետելու բոլորի համար անհասանելի Հոլիվուդին, քանի-որ մեր թիմը համոզված է, որ աշխատանքով ամեն ինչի կարելի է հասնել:
-Եվ վերադառնալով Ձեր մասնագիտական պարտականություններին ուզում եմ հնչեցնել վերջին հարցը, լուրեր կան այն մասին, որ այժմ համակարգում Ձեր բացակայությունը մեծ ուրախություն է առաջացրել քրեական որոշ խմբավորումների շրջանում, ի՞նչ կասեք այս մասին:
- Ճիշտն ասած, ես նման տեղեկության չեմ տիրապետում, բայց եթե դա համապատասխանում է իրականությանը, ես այդ փաստից կարող եմ միայն ուրախանալ, քանի որ կհամարեմ իմ ծառայության տարիները հիմնավոր ու տեղին, ես դա համարում եմ իմ աշխատանքի պատասխանը: Եթե քրեական խմբավորումները ուրախացել են իմ բացակայությունով, ապա դրանից լավ տրված գնահատական իմ աշխատանքին ես չեմ պատկերացնում:
