Կոլումբիայի ազգային հավաքականի կիսապաշտպան Խամինտոն Կամպասն աշխարհի 2026 թվականի առաջնությունում իր ելույթներն ավարտելուց հետո չի վերադարձել հայրենիք՝ իր և ընտանիքի անդամների հասցեին հնչած մահվան սպառնալիքների պատճառով։
Երկրպագուների ագրեսիայի և զայրույթի պատճառը ֆուտբոլիստի վրիպումն է ԱԱ-2026-ի 1/8 եզրափակիչի՝ Շվեյցարիայի դեմ հանդիպման 114-րդ րոպեին։ 0-0 հաշվի ժամանակ Կամպասը չէր օգտագործել նպաստավոր պահը՝ գնդակն ուղարկելով դարպասից բարձր։ Հիմնական և լրացուցիչ ժամանակն ավարտվել էր գոլազուրկ ոչ-ոքիով, իսկ հետխաղյա 11-մետրանոց հարվածաշարում կոլումբիացիները ցավալի պարտություն էին կրել 3-4 հաշվով։ Եվ թեև անձամբ կիսապաշտպանն իր հարվածն անվրեպ էր իրացրել, երկրպագուները չեն ներել նրան խաղի ընթացքում բաց թողած հնարավորությունը:
Սպառնալիքների մեծ ալիքի պատճառով ֆուտբոլիստն ստիպված է եղել փակել մեկնաբանություններն իր սոցիալական ցանցերի էջերում։ Լրագրող Կամիլո Պինտոն հայտնել է, որ խաղացողը հավաքականի հետ Կոլումբիա չի մեկնել հենց այս բացասական մթնոլորտի և անվտանգության նկատառումներից ելնելով։ Ստեղծված իրավիճակի ֆոնին Խամինտոն Կամպասը սոցցանցերում գրառումով դիմել է երկրպագուներին․
«Իմ Կոլումբիա, խնդրում եմ, երբեք մի՛ մոռացեք հարգանքի մասին։ Մենք կարող ենք էմոցիաներ ունենալ, բայց դրանք երբեք չեն արդարացնում ատելությունն ու վախի մեջ ապրելը»,- գրել է Կամպասը։
Հիշեցնենք, որ ակումբային մակարդակում Խամինտոն Կամպասը հանդես է գալիս արգենտինական «Ռոսարիո Սենտրալի» կազմում։ Շվեյցարիայից կրած պարտության հետևանքով Կոլումբիայի ազգային ընտրանին լքել է աշխարհի 2026 թվականի առաջնությունը։
