Aysor.am-ը գրում է.
ՀՀ պետական սահմանի Մեղրու և «Զվարթնոց» օդանավակայանի անցման կետերում խոլերայի դեպք չի արձանագրվել: Այս մասին Aysor.am-ին փոխանցեցին ՀՀ առողջապահության նախարարությունից:
Նշենք, որ Իրանի Իսլամական Հանրապետությունում խոլերայի դեպքեր են արձանագրվել: ՀՀ առողջապահության նախարարության կողմից շարունակվում են կանխարգելիչ և սահմանափակող բոլոր միջոցառումները հանրապետության տարածք խոլերա հիվանդության ներբերումը և հետագա տարածումը կանխարգելելու նպատակով:
Ըստ պաշտոնական տվյալների՝ Իրանում խոլերայով հիվանդության դեպքերի թիվը հասել է 210-ի։ Հիվանդների մեծ մասը Աֆղանստանի քաղաքացիներ են: Հիվանդությունն Իրան է ներբերվել Աֆղանստանի և Պակիստանի տարբեր վայրերից։
ՀՀ պետական սահմանի Մեղրիի անցման և «Զվարթնոց» միջազգային օդանավակայանի սանիտարական կարանտինային կետերի կողմից Իրանից Հայաստան ժամանող 1564 ուղևորների զննում և ջերմաչափում է իրականացվել։ Նրանցից 1195-ը Հայաստան է ժամանել ՀՀ պետական սահմանի Մեղրու անցակետով, իսկ 369-ը` Թեհրան-Երևան չվերթով` «Զվարթնոց» միջազգային օդանավակայանով։
Միաժամանակ հիվանդության կանխարգելման վերաբերյալ անհրաժեշտ խորհրդատվություն է տրամադրվել Թեհրան մեկնող 962 ՀՀ քաղաքացիներին։ Նրանցից 928-ը Իրանի Իսլամական Հանրապետություն է մեկնել Մեղրու անցման կետով, 34-ը` «Զվարթնոց» օդանավակայանից։