
Իրանցիներն այս պատերազմը դիտարկեցին՝ որպես ազգային պատերազմ, և նրանց համախմբումը համազգային էր։ Այս համատեքստում հասկանալի է, որ Իրանին անհնարին է ծնկի բերելը»,- 168.am-ի հետ զրույցում նշեց Վարդան Ոսկանյանը։
Շարունակելով միտքը, Վարդան Ոսկանյանը հավելեց, որ Իրանն ունի հսկայական ռազմական ներուժ, և Իսրայելը, հասկանալով առկա ներկայիս իրողությունները՝ ամենևին չի ցանկանում այս կոֆլիկտը շարունակել։
Ինչ վերաբերում է այս համատեքստում Հայաստանի դիրքավորմանը, հաշվի առնելով նաև Սյունիքի հետ կապված հնարավոր ռիսկերը, Վարդան Ոսկանյանը նկատեց՝ որևէ մեկի համար գաղտնիք չէ, որ Իրանը համարվում է Հայաստանի անվտանգության ճարտարապետության կարևոր բաղադրիչներից մեկը, հատկապես, երբ խոսքը վերաբերում է Սյունիքի նկատմամբ թշնամական նկրտումներին։
«Հզոր, կայուն Իրանի գոյությունը միանշանակ բխում է նաև Հայաստանի շահերից։ Պետք է պաշտոնական մակարդակում դատապարտվեն Իրանի նկատմամբ բոլոր տեսակի ագրեսիաները, որովհետև այն մեզ ոչ միայն հարևան, այլև բարեկամ պետություն է։
Կարծում եմ՝ այսուհետև ևս պետք է առաջ մղվի հայ-իրանական ռազմավարական դաշինք ունենալու գաղափարը։ Իրանը ցույց տվեց, որ ունի հմտություններ ռազմական տիրույթում զգալի ուժ դնելու և այդ ուժը կիրառելու։Կարծում եմ՝ այստեղ չպետք է որևէ երկմտանք մնա Հայաստան-Իրան ռազմավարական դաշինք ունենալու վերաբերյալ։
Հաշվի առնելով մեկ այլ կարևոր հանգամանք, այն է, որ ՀՀ հանրությունն իր մեծամասնությամբ Իրանի հետ դաշինքի կողմնակից է, դատելով այն հանրային արձագանքից, որը տեղի ունեցավ այս պատերազմի օրերին, իրանցիները սա գնահատում են։
Մյուս կողմից էլ՝ պարզ է, որ պաշտոնական Բաքվի կողմից իսրայելական ագրեսիան չդատապարտելու դիրքորոշումը, նաև իրանական տարբեր լրատվամիջոցներում, տարբեր աղբյուրներում առկա տվյալները՝ Բաքվի աջակցությունն Իսրայելին՝ Իրանի դեմ ագրեսիային հնարավորություն են բացել Իրանի հետ համագործակցելու նաև այս ուղղությամբ։
Այսինքն՝ ապահովելու ոչ միայն ՀՀ անվտանգությունը, այլև թուլացնելու մեր թշնամուն՝ ի դեմս Բաքվի բարբարոսական վարչախմբի»,- շեշտեց Վարդան Ոսկանյանը։