1in.am-ը գրում է.
Իտալիայի նախկին վարչապետ Սիլվիո Բեռլուսկոնին, ով 4 տարվա ազատազրկման է դատապարտվել ֆինանսական խարդախությունների գործով, իր կողմնակիցներին հայտնել է, որ դատական իշխանությունների կողմից հետապնդումների պատճառով չի քնում արդեն 55 օր և 11 կիլոգրամ նիհարել է: Այս մասին փոխանցում է RIA Novosti-ն:
«Սրանք իմ կյանքի ամենասարսափելի օրերն են: Ինձ ցանկանում են դուրս նետել պատմությունից այդքան անարդար և ամոթալի մեղադրանքով: Ինձ ուզում են գող համարել, չնայած ես երբեք չեմ գողացել»,- ասել է նա՝ երեկ ուշ երեկոյան Հռոմում իր «Ազատության ժողովուրդ» կուսակցության պատգամավորների ու սենատորների հետ հանդիպման ժամանակ:
Բեռլուսկոնին կրկնել է մեղադրանքը՝ ուղղված Իտալիայի քննչական և դատական մարմինների դեմ, որոնք իր կարծիքով՝ կործանարար օպերացիա են իրականացնում իրավական պետության դեմ:
Հավաքի մասնակիցները որոշել են, որ եթե հոկտեմբերի 4-ին սենատի հատուկ հանձնաժողովը քվեարկի Բեռլուսկոնիին սենատորի լիազորություններից զրկելու օգտին, իրենք զանգվածաբար վայր կդնեն պատգամավորական և սենատորական մանդատները: