1in.am-ը գրում է.
Չինաստանում դատարանը Պեկինի բնակչին դատապարտել է մահապատժի կայանատեղիում բռնկված վեճի ժամանակ երեխայի սպանության համար, հաղորդում է BBC News-ը:
2013թ. հուլիսին 39-ամյա Խան Լեյը երկու տարեկան աղջնակին հանել է սայլակի միջից և գցել գետնին, երբ երեխայի մայրը հրաժարվել է կայանատեղիում իր տեղը նրան զիջել: Մանկահասակ երեխան մահացել էր ստացված վերքերից: Դրանից հետո հանցագործը ծեծի էր ենթարկել երեխայի մորը, որից հետո թաքնվել դեպքի վայրից, սակայն ոստիկանությանը հաջողվել էր գտնել նրան:
Դատարանում Խանը հայտարարել է, որ չի պատրաստվել վնասել ինչ-որ մեկին: Նա նշել է, որ հարբած է եղել և ենթադրել է, որ սայլակում եղել են մթերքներ, այլ ոչ թե երեխա:
Դատարանը, սակայն, բավարարել է դատախազների՝ տղամարդուն մահապատժի դատապարտելու պահանջը, որոնք մատնանշել են, որ ամբաստանյալը հանցագործությունը կատարել է բանտից դուրս գալուց մոտ մեկ տարի հետո, որտեղ նա իր պատիժն է կրել մեկ այլ հանցագործության համար:
Չինաստանում այս պատմությունը հասարակական մեծ աղմուկ է բարձրացրել, քանի որ մարդկանց խիստ բարկացրել էր չնչին պատճառով երեխայի սպանությունը: