Panorama.am-ը գրում է.
Սիրիայի քիմիական զենքի պաշարներն ոչնչացնելու համար 1 միլիարդ դոլար կպահանջվի, հայտարարել է Սիրիայի նախագահ Բաշար Ասադը ամերիկյան Fox News լրատվական ալիքին տված հարցազրույցում:
Ըստ նրա, «տեխնիկապես դա շատ բարդ է» և քիմիական զենքի արսենալի ոչնչացումը մոտ մեկ տարի կպահանջի: «Մենք պատրաստ ենք մեր քիմիական զենքը հանձնել ցանկացած երկրի, որը կգնա նման ռիսկի»,-ասել է Սիրիայի նախագահը, հայտնում է ВВС-ին:
Նա նաև հայտնել է, որ Սիրիան լրացուցիչ պայմաններ չի առաջ քաշում և չի առարկում, որ քիմիական զենքի գծով ՄԱԿ փորձագետները կրկին այցելեն Սիրիա:
Չորեքշաբթի ՌԴ ԱԳ նախարար Սերգեյ Լավրովը հայտարարեց, որ Ռուսաստանը տվյալներ ունի այն մասին, որ Սիրիայում քիմիական զենքն ընդդիմությունն է կիրառել և այդ տվյալները կներկայացվեն ՄԱԿ Անվտանգության խորհրդին: Մոսկվան առաջարկել է Դամասկոսին քիմիական զենքի հանդեպ միջազգային հսկողություն սահմանել, ինչին Սիրիան արդեն համաձայնվել է: Սեպտեմբերի 14-ին Ռուսաստանն ու ԱՄՆ համաձայնեցրին Սիրիայում քիմիական զենքը միջազգային վերահսկողությանը հանձնելու ծրագիրը: Ըստ պայմանավորվածության, միջազգային տեսուչները կմեկնեն Սիրիա 2013 թ. նոյեմբերից ոչ ուշ: Իսկ սիրիական քիմիական զնեքի պաշարները նախատեսվում է վերացնել արդեն 2014 թ. կեսին: Զենքի ոչնչացման գործնական հարցերը կլուծի Քիմիական զենքի արգելման կազմակերպությունը: Ֆինանսավորմանը կմասնակցեն նաև միջազգային դոնորներ:
Քիմիական զենքը դուրս կբերվի Սիրիայից և կոչնչացվի երկրի սահմաններից դուրս: Ապստամբներն ու նրանց արևմտյան ու արաբական դաշնակիցները օգոստոսի 21-ի հարձակման մեղքը բարդում են Ասադի ռեժիմի վրա: Ասադի ռեժիմը պնդում է, որ քիմիական զենք են կիրառել նաև ապստամբները: Քաղաքացիական պատերազմը Սիրիայում շարունակվում է արդեն 2 տարի: Այդ ընթացքում, ՄԱԿ տվյալներով, ավելի քան 100 հազար մարդ զոհվել է, 2 մլն՝ դարձել փախստական, ևս 4 մլն՝ ներքին տեղահանված անձինք են: ԱՄՆ-ն Ասադին մեղադրում է օգոստոսի 21-ին Դամասկոսի արվարձանում քիմիական հարձակման մեջ, որի հետևանքով ավելի քան 1400 մարդ զոհվեց:
Սիրիական իշխանությունները կտրականապես հերքում են քիմիական զենքի կիրառումն ու հարձակման մեջ մեղադրում են ապստամբներին: