Panarmenian.net-ը գրում է.
Աղբյուրը Սիրիայի ԱԳՆ-ում հաստատել է, որ ԱՄՆ-ն ու նրա արևմտյան դաշնակիցները մեղսակից են ճգնաժամի բորբոքմանը Սիրիայում և փորձում են իրենց կամքը թելադրել Սիրիայի ժողովրդին, հայտնում է սիրիական SANA գործակալությունը: «Դա արտահայտվեց ԱՄՆ, Ֆրանսիայի ու Մեծ Բրիտանիայի ԱԳ նախարարների ելույթներում: Մի կողմից նրանք ասում են, որ կողմ են ճգնաժամի քաղաքական լուծմանը, մյուս կողմից՝ սատարում են ավազակային կազմավորումներին, որոնք կապված են «Ջեբհաթ ան Նուսրա»-ի հետ: Այն դեպքում, երբ այդ կազմավորման անդամները շարունակում են հանցագործություններ կատարել Սիրիայի ժողովրդի դեմ՝ նպատակ ունենալով ձգձգել ճգնաժամը»,-ասել է աղբյուրը:
Սեպտեմբերի 16-ին Փարիզում կայացած մամլո ասուլիսը, որին մասնակցեցին երեք երկրների ներկայացուցիչները, բացահայտեց նրանց թշնամական ծրագրերը Սիրիայի հարցում և միջսիրիական երկխոսությունը կանխորոշելու փորձերը: «Նրանց նպատակն է իրենց կամքը պարտադրել Սիրիայի ժողովրդին և օգնություն ցուցաբերել իրենց խամաճիկներին, որոնք բացահայտ կերպով կոչ են անում ԱՄՆ-ին ագրեսիա սանձազերծել Սիրիայի ու նրա ժողովրդի դեմ: ԱՄՆ և նրա դաշնակիցների խոսքերն այն մասին, թե նրանք իբր հավատարիմ են ճգնաժամի քաղաքական կարգավորմանը, հակասում են նախապայմաններ առաջ քաշելու նրանց փորձերին և ավազակային կազմավորումների ֆինանսավորմանն ու սպառազինմանը, որոնք կռվում են խաղաղ բնակչության դեմ: Ցանկացած խոսակցություն Սիրիայում քաղաքական ու սահմանադրական օրինականության մասին բացառապես Սիրիայի ժողովրդի իրավունքն է: Բաշար ալ Ասադը սիրիացիների ընտրած օրինական նախագահն է, նա կմնա իր պաշտոնում այնքան ժամանակ, որքան ժողովուրդը կցանկանա: Պետության ղեկավարը կատարում է իր պարտականություններն ըստ Սահմանադրության, որը հաստատել է Սիրիայի ժողովուրդը: Ում դուր չի գալիս այս իրողությունը, կարող է չմասնակցել «Ժնև-2» խորհրդաժողովին»,-հայտարարել է Սիրիայի ԱԳՆ-ն:
Ըստ ՄԱԿ կանոնադրության, ՄԱԿ ԱԽ մշտական անդամ երկրները պետք է չեզոք լինեն ու հարգեն միջազգային իրավունքը: Անթույլատրելի է նրանց կողմից իրենց կամքը պարտադրելը այլ երկրներին: Ըստ աղբյուրի, նրանք պետք է դադարեցնեն այլ երկրներում ապակայունացմանն ուղղված իրենց գործողությունները և սպառնալիքները ինքնիշխան պետություններին՝ անմիջական կամ տեղի գործակալների միջոցով:
Նախօրեին Փարիզում տեղի է ունեցել ԱՄՆ, Մեծ Բրիտանիայի ու Ֆրանսիայի ԱԳ նախարարների հանդիպումը, որտեղ, մասնավորապես, ԱՄՆ պետքարտուղար Ջոն Քերին հայտարարեց, որ Սիրիայի նախագահ Բաշար Ասադի կառավարությունը «կորցրել է օրինականությունը»: Փարիզյան հանդիպմանը ներկա էր նաև Թուրքիայի ԱԳ նախարար Ահմեդ Դավութօղլուն: Սիրիայում արդեն 2 տարի է քաղաքացիական պատերազմ է: Այդ ընթացքում, ՄԱԿ տվյալներով, ավելի քան 100 հազար մարդ զոհվել է, 2 մլն՝ դարձել փախստական, ևս 4 մլն՝ ներքին տեղահանված անձինք են:
ԱՄՆ-ն Ասադին մեղադրում է օգոստոսի 21-ին Դամասկոսի արվարձանում քիմիական հարձակման մեջ, որի հետևանքով ավելի քան 1400 մարդ զոհվեց: Սիրիական իշխանությունները կտրականապես հերքում են քիմիական զենքի կիրառումն ու հարձակման մեջ մեղադրում են ապստամբներին: