168.am-ը գրում է․
Գեղարքունիքի ՔՊ-ական մարզպետ, Կարեն Սարգսյանի կենսագրության մեջ, որը տեղադրված է մարզպետարանի կայքում, նշված է, որ նա 2016թ.-ին ընդունվել է ոչ պետական՝ Մոսկվայի մարզային իրավունքի եւ կառավարման ինստիտուտի Մենեջմենթի բաժինը, որտեղ սովորում է մինչ օրս Ըստ մամուլի տեղեկությունների, նման բուհ վաղուց չի գործում, վերջին ստուգման ժամանակ այդ բուհում պետական հավատարմագրման հետ կապված խնդիրներ էին հայտնաբերվել, եւ բուհը զրկվել է պետական հավատարմագրումից: Ի դեպ, երբ փորձում ես մուտք գործել չգործող բուհի www.moiup.ru կայք, առցանց կազինո է բացվում:
Aravot.am-ը Գեղարքունիքի մարզպետից հետաքրքրվեց՝ ինչպե՞ս է մինչ օրս՝ արդեն 8 տարի, սովորում մի բուհում, որը վաղուց չի գործում, այդ մասին նաեւ մամուլում տեղեկություններ կան: «Գոյություն չունի՞, ես չեմ տեսել»,-ասաց մարզպետը:
Մեր դիտարկմանը, փաստորեն չի սովորում եւ չի էլ ավարտել գոյություն չունեցող բուհը, Կարեն Սարգսյանը հետեւյալ կերպ արձագանքեց. «Ես արդեն ունեմ բարձրագույն կրթություն, առաջին իմ կրթությունն է բարձրագույն, ավարտել եմ Հայաստանի ֆիզիկական կուլտուրայի եւ սպորտի պետական ինստիտուտը»: Իսկ երկրորդ բուհը՝ նորից պնդեցինք մենք, չէ՞ որ այն գոյություն չունի, բայց նշված է ձեր կենսագրության մեջ: «Երկրորդը չեմ ավարտել, մնացել է թերի, ու ճիշտն ասած չեմ հետաքրքրվել՝ արդեն երեք տարի է: Կարծում եմ, ոչ մի խնդիր չի առաջանա, ես բարձրագույն կրթություն ունեմ, եւ դա իմ երկրորդ բարձրագույն կրթությունն էր»,-ասաց մարզական լրագրողի որակավորմամբ Գեղարքունիքի մարզպետը:
