1in.am-ը գրում է.
Չիլին այս օրերին նշում է երկրի նախկին նախագահ Սալվադոր Ալյենդեին իշխանությունից հեռացնելու ու նրա մահվան տարելիցը՝ հայտնում է RIA Novosti-ն:
Տեղի ԶԼՄ-ները հայտնում են, որ երեքշաբթի երկրի մայրաքաղաք Սանտյագոյում տեղի է ունեցել հիշատակի անսովոր ակցիա՝ ի հիշատակ բռնակալության ժամանակ անհետ կորածների:
Երիտասարդները պառկել են փողոցներում ու կազմել կենդանի շղթա հենց նախագահական պալատի մոտ: Նման կերպ նրանք իրենց հարգանքի տուրքն են մատուցել հազարավոր անհետ կորածներին:
Այս ակցիայի անցկացման գաղափարը մի խումբ երիտասարդ նկարիչներինն է: Նրանք ակցիայի մասնակիցներին հավաքել են սոցցանցերի միջոցով:
Չիլիի ռազմական հեղաշրջումը տեղի է ունեցել 1973թ. սեպտեմբերի 11-ին, երբ երկրի ցամաքային զորքերի գլխավոր հրամանատար, գեներալ Ավգուստո Պինոչետը իշխանությունից հեռացրեց նախագահ Ալյենդեին, որը ինքնասպան եղավ նախագահական պալատը գրոհով վերցնելու ժամանակ:
Պաշտոնական տվյալներով՝ Պինոչետի կառավաման տարիներին քաղաքական դրդապատճառներով սպանվել է մոտ 3200 մարդ, մոտ 1200-ը՝ անհետ կորել, կտտանքների է ենթարկվել մոտ 28 հազար մարդ: