Doctors.am-ը գրում է.
Հաճախ այն, ինչ մարդիկ հատկապես շատ են սիրում՝ պաղպաղակ, կարտոֆիլ-ֆրի, հեռուստացույց, օգտակար չեն օրգանիզմի համար: Սակայն եթե պարել սիրում եք, ապա այս կանոնից գոնե մեկ բացառություն կա:
Ապացուցված է, որ հաճախակի պարող մարդիկ առավել առողջ են: 2010-2011թթ. գիտնականները, ուսումնասիրելով 10.000 մարդու ազատ ժամանցի սովորությունները, պարզել են, որ նրանց մոտ, ովքեր անցած տարում պարզապես հաճույքի համար գոնե մեկ անգամ պարել են, 62%-ով ավելի մեծ է առողջական խնդիրներ չունենալու հավանականությունը:
Պարզ չէ սակայն՝ իրականում պատճառն ա՞յն է, որ պարող մարդիկ առողջ են, թե՞ առողջ մարդիկ ի վիճակի են պարելու: Բազմաթիվ հետազոտություններ կան, որոնք հաստատում են ֆիզիկական ակտիվության դրական ազդեցությունն առողջության վրա: Մասնավորապես, պարելը նույնպես կարող է ամրացնել սրտամկանը:
Ընդ որում, ամենահաճելին այն է, որ կարիք չկա բարդ պարային շարժումներ կատարելու. պարզապես միացրեք երաժշտությունը և շարժվեք` ինչպես ուզում եք:
