«Սպասում» արձանի մանրակերտը Ստեփան Թարյանը կերտել է 1930-ականներին՝ գիպսից: Նրա ծննդյան 90-ամյակի առթիվ 1989թ. դեկտեմբերի 29-ին ՀԽՍՀ կառավարությունը որոշեց Օղակաձև զբոսայգում տեղադրել «Սպասում» արձանը: Արձանի ստեղծման աշխատանքները (ձուլում, տեղադրում) իրականացրին քանդակագործի զավակները (Սուրենը և Աննան) և 1999-ին Թարյանի ծննդյան 100-ամյակի առթիվ «Սպասում» բրոնզաձույլ արձանը նվիրեցին քաղաքամայր Երևանին:
«Սպասում» դեկորատիվ արձանի հանդիսավոր բացումը տեղի ունեցավ 2000թ. հուլիսի 29-ին Օղակաձև զբոսայգում` Ալեք Մանուկյան փողոցի հարևանությամբ: Բացմանը խոսք ասացին Երևանի քաղաքապետարանի ներկայացուցիչը, քանդակագործ Խաչատուր Իսկանդարյանը, քանդակագործի որդին` Սուրեն Թարյանը:
Այս արձանի գիպսե կաղապարը տեղադրվել է Խարբերդի ճանապարհին:
2002 թվականին բրոնզաձույլ արձանի ձախ ոտքի մի մասը «մետաղակեր» վանդալները կտրեցին և տարան: Արձանը վերականգնեց ճանաչված դրվագող Ներսես Չարախչյանը Սուրեն Թարյանի նախաձեռնությամբ և միջոներով:
Արձանի նյութը` բրոնզ, գրանիտ, բարձրությունը 1,8 մ, քանդակագործ` Ստեփան Թարյան:
Ստեփան Թարյանը (1899-1954) ծնվել է Թիֆլիսում: 1918թ. ավարտել է Թիֆլիսի Գեղարվեստական ուսումնարանը: 1920թ. որմնանկարներ է պատճենահանել Անիում: 1927թ. ավարտել է Լենինգրադի Գեղարվեստի ակադեմիայի քանդակագործության բաժինը:
Թարյանը հանդիսանում էր Գ. Սունդուկյանի անվ. թատրոնի նկարիչ-ձևավորողը: Ձևավորել է 51 բեմադրություն («Հրացանավոր մարդը», «Գևորգ Մարզպետունի», «Խաթաբալա», «Քանդված օջախը», «Պեպո», «Քաջ Նազար», «Նապոլեոն Կորկոտյան» և այլն): Ձևավորել է նաև «Գիքորը», «Քրդեր և եզդիներ», «Լոդր», «Կիկոս», «Արևի զավակներ» կինոնկարները:
Նրա գործերից են`
«Քարտաշ», գիպս, 1926թ. Սանկտ-Պետերբուրգի Գեղ. Ակադեմիայի թանգարան
«Նկարիչ Վանո Խոջաբեկյան», դիմաքանդակ, մարմար, 1930թ., ՀԱՊ, Երևան
«Դերասանուհի Մ. Պարոնիկյան», դիմաքանդակ, մարմար, 1945թ., ՀԱՊ, Երևան
«Ա.Առաքելյան», դիմաքանդակ, մարմար, ՀԱՊ, Երևան
Նյութի աղբյուր՝ http://nakhshkaryan.blogspot.com/2013/08/blog-post_4928.html
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել