1in.am-ը գրում է.
Հնդկական Ջայփուր քաղաքի գեղատեսիլ վայրերով հմայվող զբոսաշրջիկներն ականատես են եղել, թե ինչպես է տղամարդը համոզել սուզվող փղին խուճապի չմատնվել և ափ դուրս գալ:
Ջայփուրը հայտնի է իր արևելյան ճոխությամբ, սակայն զբոսաշրջիկներն այստեղ են գալիս ոչ միայն տեսարժան վայրերով հիանալու, այլև փղերի վրա նստելու համար: Սակայն լարված գրաֆիկի և շոգի պատճառով փղերը երբեմն ռիսկի են դիմում և զովանալու համար մտնում են խորը լճերի մեջ:
Բրիտանական Daily Mail հրատարակչության տվյալներով՝ մի քանի օր առաջ Անարկալի անունով փիղը նույնպես այդ նպատակով մտել է Մաոտայի ջրերը: Զբոսաշրջիկները նկատել են, որ ջրային պրոցեդուրաների ժամանակ փիղն ավելի է խորանում ջրի մեջ և այդ մասին տեղեկացրել են նրա տիրոջը:
Այն պահին, երբ փղի տերը՝ Արշադ Ալին հասել է ջրամբարին, հսկայական կենդանին սկսել է սուզվել:
Ձկնորսներն իրենց նավակով Արշադին հասցրել են մինչև փիղը, և տղամարդը սկսել է ետ կանչել կենդանուն, սակայն վերջինս, վախից անշարժացած, մնացել է կանգնած իր տեղում:
Այդ պահին Արշադը թռել է փղի մեջքին և նրան համոզել դուրս գալ ջրից: Այդ գործողությունն իր արդյունքը տվել է. վախեցած կենդանին հնազանդվել է տիրոջը և դանդաղ ափ է դուրս եկել:
«Անցած տարի Ջայփուրի իշխանություններն արգելել են փղերին ջուրը մտնել, Անարկալին սովորել էր դրան, սակայն, հնարավոր է, որ ուժեղ շոգն էր ստիպել կենդանուն անտեսել արգելքը և ջուրը մտնել»,– զբոսաշրջիկներին բացատրել է փղի տերը:
Լուսանկարները՝ այստեղ