Ռուսաստանցի պրոդյուսեր, Comedy Club Production-ի հիմնադիր Արթուր և Էլինա Ջանիբեկյանները մկրտել են իրենց 6-ամսյա որդուն`Արեգին, Վարդենիսի Սբ. Հակոբ Մծբինեցու եկեղեցում: «Մկրտությունը յուրաքանչյուր քրիստոնյա հայի և իհարկե մեր ընտանիքի կյանքում ամենակարևոր իրադարձություններից մեկն է։ Մենք մկրտել ենք մեր չորրորդ երեխային Հայաստանի Ապարանի շրջանի Վարդենիս գյուղի Սբ. Հակոբ Մծբինեցու եկեղեցում, որտեղից սերում է մեր Արեգի նախապապու` Ջանիբեկյան-Հակոբյանի տոհմը»,- լուսանկարին կից գրել է նա։
Էլինան հավելել է, որ 1884-1890 թվականներին կառուցված եկեղեցին խորհրդային իշխանության տարիներին հացահատիկի պահեստի էր վերածվել, սակայն տարիներ անց կրկին վերականգնվել է։
«2011 թվականին կիսավեր տաճարան ամբողջովին վերականգնվել է և օծվել մեր պապի` իսկական հայրենասեր, հայրենի հողին ու արմատներին անվերջ նվիրված մարդու, ջանքերի շնորհիվ»,- նշել է նա։
Հայտնի պրոդյուսերի կինը հետևորդներին պատմել է նաև հրաշագործ Հակոբ Մծբինեցու պատմությունը, որի պատվին էլ անվանվել է եկեղեցին։
Բանն այն է, որ Հակոբ Մծբինեցու անվան հետ է կապված Նոյյան տապանի պատմությունը։ Ավանդազրույցի համաձայն, հրաշագործ Մծբինեցին նպատակ էր դրել Արարատ բարձրանալ` տեսնելու Նոյյան տապանը և վերցնել մի կտոր նրանից։
Վերելքի երկար և տանջալից օրերից հետո Հակոբը քնել է ձյունոտ լանջին և երազում հրեշտակ տեսել, որն ասել է. «Աստված լսեց քո աղոթքները. այն, ինչը ոտքերիդ տակ է, տապանի մի մասնիկ է։ Վերցրո՛ւ և մի՛ փորձիր ավելի վերև բարձրանալ»։
Արթնանալով և իր կողքին տեսնելով քարացած փայտի մի կտոր, Հակոբը փառավորեց Աստծուն և հետդարձի ճամփա բռնեց։
Ջանիբեկյանը հավելել է, որ այսօր Նոյյան տապանի այդ մասունքը պահվում է Սբ. Էջմիածնում։
Համացանցի օգտատերերը շնորհավորել են ընտանիքին երեխայի մկրտության առթիվ, ինչպես նաև շնորհակալություն հայտնել Էլինային հետաքրքիր պատմության համար։
Փոքրիկ Արեգը ծնվել է 2020 թվականի նոյեմբերի 5-ին։ Արթուր և Էլինա Ջանիբեկյանները նրանից բացի ունեն ևս երկու որդի (Նարեկ և Արամ) և մեկ դուստր (Էվա)։
