1in.am-ը գրում է.
Ադրբեջանական կողմին գերի ընկած Հակոբ Ինջիղուլյանի հարազատները հավաքվել են ԱԳՆ դիմաց՝ հայցելու նախարարության աջակցությունը իրենց հարազատին վերադարձնելու համար: Քիչ առաջ Հակոբ Ինջիղուլյանի հորեղբոր որդի Արման Ինջիղուլյանը և հայրը՝ Գուրգեն Ինջիղուլյանը, հանդիպեցին փոխնախարար Աշոտ Հովակիմյանի հետ, որը վստահեցրել է, որ վաղը կհանդիպեն Կարմիր Խաչի ներկայացուցիչների հետ և կքննարկեն Հակոբ Ինջիղուլյանին վերադարձնելու հարցը:
Ինչպես հայտնեց Արման Ինջիղուլյանը, փոխնախարարն ասել է նաև, որ իրենք անում են հնարավոր ամեն բան՝ մեր գերուն վերադարձնելու համար, սակայն գործը դժվարացնում է Ադրբեջանի հետ դիվանագիտական հարաբերություններ չունենալը:
Նշենք նաև, որ Ինջիղուլյանները այսօր եղել են նաև Կարմիր Խաչի հայաստանյան գրասենյակի առաջ, որտեղից ստացել են նույն պատասխանը, ինչ երեկ:
Հիշեցնենք, որ օգոստոսի 7-ի լույս 8-ի գիշերը՝ ժամը 3:00-ի սահմաններում, ծառայությունն իրականացնելու ժամանակ, տեղանքում չկողմնորոշվելու հետևանքով, զինծառայող Հակոբ Ինջիղուլյանը առաջնագծում մոլորվել է և սխալմամբ անցել Ադրբեջանի ԶՈՒ կողմից վերահսկվող տարածք: