1in.am-ը գրում է.
Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ սկսվել է Արսեն Ալեքսանյանի և Տիգրան Քոլոյանի գործով դատավարությունը:
Ըստ մեղադրանքի՝ Ալեքսանյանն ու Քոլոյանը, գիտակցելով, որ իրենց տրամադրած տեղեկատվությունը կեղծ է, 2012 թվականի հոկտեմբերի 15-ին ոստիկանության Կենտրոնականի բաժնում սուտ հաղորդում են տվել, թե սեպտեմբերի 25-ին, գիշերվա ժամը 1-ն անց 9 րոպեի սահմաններում Երևան քաղաքի Բեյրութի փողոցում, մանկական զբոսայգու մոտ իրենց և իրենց ընկերներ Գևորգին ու Հարությունին է մոտեցել «Օպել» մակնիշի մեքենա, որի մեջ եղած հինգ երիտասարդները հայհոյել են իրենց հասցեին, ծեծի են ենթարկել, իսկ նրանցից մեկը՝ Վիգեն Ա.-ն, մոտ կանչելով «Սոնա» մականունով Արսեն Ալեքսանյանին, բացահայտ հափշտակել է նրա պայուսակը, որի մեջ եղել է 200 դոլար:
27-ամյա Արսեն Ալեքսանյանին և 43-ամյա Տիգրան Քոլոյանին մեղադրանք է առաջադրվել ՀՀ քրեական օրենսգրքի 333 հոդվածի 1-ին մասով: Նրանց նկատմամբ խափանման միջոց է ընտրվել չհեռանալու մասին ստորագրությունը: