«Անդրադառնալով Մարդու իրավունքների պաշտպանի գրասենյակին տրամադրվող տարեկան բյուջեի կրճատման մասին կառավարության որոշմանը՝ «Իրավունքի» հետ զրույցում ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահի տեղակալ, ԼՀԿ-ական պատգամավոր Անի Սամսոնյանը նախ ասաց, որ բնական է՝ պատերազմից հետո պետք է գործադիրն անցներ բյուջեի ծախսումների տնտեսման ռեժիմի:
-Բայց այդ ծախսումների կրճատումները, բյուջեի վերանայումները պետք է իրականացվեն այնպես, որպեսզի վնաս չհասցնեն ինստիտուտներին: Ունենք ՄԻՊ-ի գործունեության ֆինանսավորման օրենքով ամրագրված պահանջ, որ ամեն տարի տրվող բյուջեն պետք է պակաս չլինի նախորդ տարվանից: Եվ սա ամրագրելը ոչ թե նպատակ է ունեցել սահմանափակել կառավարության հնարավորությունները տնօրինելու և վերանայելու բյուջեն, այլ պարզապես պաշտպանելու ինստիտուտը: Այսինքն՝ այստեղ առաջնահերթությունը ՄԻՊ-ի աշխատանքի անկախության ապահովումն է: Մինչդեռ այս քայլով կառավարությունը հանում է այդ դրույթը, և ստացվելու է այնպես, որ լինի այս իշխանությունը կամ մեկ այլ իշխանություն, եթե իրեն դուր չեկավ ՄԻՊ-ի աշխատանքը, անկախությունը, կարող է ճնշումներ գործադրել գրասենյակի աշխատանքի վրա՝ իր ուզած չափով ավելացնելով կամ պակասեցնելով հատկացվող բյուջեն:
-Ձեր գնահատմամբ՝ այս փուլում ինչո՞վ էր խանգարում Արման Թաթոյանն իշխանությանը, որ այսկերպ փորձում են ճնշում գործադրել իր վրա:
-Չեմ կարող ասել, թե ինչով է խանգարում, և չեմ էլ ուզում 100 տոկոսով պնդել, թե այստեղ կա դիտավորություն:
«Բայց եթե քննարկումներն այնպիսի փուլ մտան, որ իշխող մեծամասնությունը, օրինակ, խորհրդարանում ասաց՝ չէ, պետք է այսպես լինի և վերջ, կմտածենք, որ դիտավորություն կա: Պարզապես, ուզում եմ այս պահին ենթադրել, որ իշխանությունը չի հասկանում ՄԻՊ ինստիտուտի էությունը և չի գիտակցում, որ այս դրույթը շատ կարևոր նախապայման է՝ ոչ միայն պաշտպանի աշխատանքը Հայաստանի ներսում, այլ նաև դրսում: Այսինքն՝ սրանով նաև վնաս ենք հասցնելու գրասենյակի միջազգային հեղինակությանը»,-գրում է թերթը:
Նյութն ամբողջությամբ կարդացեք թերթի այսօրվա համարում:
