Հագուստը միշտ կարևոր դեր է խաղացել կանանց և տղամարդկանց միջև սեռային տարբերությունն ընդգծելու համար: Կանացի հագուստը միշտ տարբերվել է տղամարդկանց հագուստից, չնայած այն բանին, որ պատմության ընթացքում եղել են դեպքեր, երբ մի սեռի ներկայացուցիչները ինչ-ինչ պատճառներով հագել են հակառակ սեռի հագուստը: Իհարկե, այսօր մենք ավելի հանդուրժողական ժամանակաշրջանում ենք ապրում, սակայն եղել են ժամանակներ, երբ հակառակ սեռի հագուստը կրելու համար մարդկանց նույնիսկ պատժել են, կամ նրանք հասարակության կողմից ծիծաղի առարկա են դարձել ու ամոթանք ստացել:
Ձեզ ենք ներկայացնում պատմության մեջ հայտնի մարդկանց, ովքեր հագել են հակառակ սեռի հագուստ:
10. Մարի Ռիդ
18-րդ դարում ծովահենները բավականին դաժան կյանքով էին ապրում, չնայած շատ գրական ստեղծագործություններում նրանց մասին գեղեցիկ պատմությունների նկարագրություններին: Եվ չնայած այդ ծանր ու դաժան կյանքին ծովահեն տղամարդկանց հետ եղել են նաև կին ծովահեններ:
Այսպես օրինակ Մարի Ռիդը, ում դեռևս մանուկ հասակում ծնողները տղայի հագուստ էին հագցնում և վերաբերվում որպես տղայի, որպեսզի իրենց հարազատներից գումար կորզեն: Իր ամբողջ կյանքի ընթացքում Մարին կրել է տղամարդու հագուստ և ծառայել որպես սպասավոր և նավի անձնակազմի օգնական: Հետագայում նա նաև ծառայել է որպես հետևակային զինվոր, մինչև որ սիրահարվել է մեկ այլ զինվորի ու ամուսնացել նրա հետ: Երբ նրա ամուսինը մահացավ, նա նորից սկսեց տղամարդու հագուստ կրել:
Նույնիսկ այն ժամանակ, երբ հավատացած էին, թե կինը նավին անհաջողություն է բերում, նա միացավ ծովահենների մի խմբի, երբ վերջիններս գրավեցին այն նավը, որում Մարին ծառայում էր և խնդրեցին նրան միանալ իրենց:
Այնուամենայնիվ, ծովահենների նավը գրավվում է, և Մարիին մահապատժի են ուզում ենթարկել, սակայն քանի որ նա պնդում է, թե երեխայի է սպասում, նրա մահապատիժը հետաձգում են մինչև երեխայի լույս աշխարհ գալը: Սակայն Մարին մահանում է բանտում ինչ-որ հիվանդության պատճառով:
9. Դեբորա Սամփսոն
Ամերիկյան Անկախության պատերազմի ժամանակ Ռոբերտ Շարթլիֆ Սամփսոն անունով մի զինվոր է տենդով հիվանդանում, և երբ բժիշկը պետք է բուժեր նրան, բացահայտում է, որ զինվորն իրականում կին էր:
Դեբորա Սամփսոնը ցանկանում էր միանալ զորքերին ու կռվել, սակայն քանի որ կին էր, դա նրա համար հնարավոր չէր: Այպիսով, Դեբորան ներկայանում է որպես իր մահացած եղբայրը և կարողանում միանալ հեղափոխական զորքին: Նա մասնակցոմ է մի քանի ճակատամարտերի և դրանցից մեկի ժամանակ վիրավորվում մուշկետի գնդակներից, և վախենալով, որ նրա սեռը կբացահայտվի, պահանջում է, որ իր վերքերը չնայեն: Հետագայում, երբ նա տենդով է հիվանդանում, բժիշկը բացահայտում է նրա իրական սեռը, սակայն այդ գաղտնիքը պահում է մինչև պատերազմի ավարտը: Ավելի ուշ, երբ կինը ամուսնանում և երեխաներ է ունենում, նոր կառավարությունը նրան զինվորական թոշակ է տրամադրում` որպես առաջին կին զինվորի:
8.Ժաննա դ’Արկ
Ժաննա դ’Արկը Կաթոլիկ եկեղեցու սուրբ է և Ֆրանսիայի 100-ամյա պատերազմի հերոս: Հայտնի է, որ 12 տարեկանից Ժաննան տեսիլքներ էր ունենում և Աստծուց պատգամներ ստանում: Այս աստվածային շնորհի պատճառով նա հավատում էր, որ ինքն ընտրյալ է, ով պետք է պայքարի անգլիացիների դեմ և դուրս հանի նրանց Ֆրանսիայի տարածքից:
Հայտնի է, որ Ժաննան հանդիպում է զորքերի հրամանատարի հետ և կանխագուշակում, որ ֆրանսիական զորքերը հաղթանակ պետք է տանեն: Այնուհետև նրան հաջողվում է հանդիպել թագավոր Կառլոս 7-րդի հետ, և նա առաջին անգամ ներկայանում է տղամարդու հագուստով: Իսկ դրանից հետո երբ Կառլոսը, վստահելով Ժաննային, զորք է տրամադրում նրան առաջնորդելու համար, Ժաննան ժամանակի ասպետների նման հագնված մի քանի բարեհաջող ճակատամարտեր է վարում և ռազմավարական առումով մեծ դեր խաղում ֆրանսիացիների հաղթանակում:
Ի վերջո Ժաննային գերեվարում են և հանձնում անգլիացիներին, ովքեր նրան մեղադրում են հերետիկոսության մեջ այն բանի համար, որ նա տղամարդու հագուստ էր կրել: Սկզբում նա համաձայնագիր է ստորագրում, որ այլևս տաղամարդու հագուստ երբևէ չի կրի, սակայն 4 օր չանցած նա նորից հագնում է տղամարդու հագուստ, որի համար նրան այրում են խարույկի վրա` հերետիկոսության մեջ մեղադրելով:
7. Հատշեպսուտ
Հին աշխարհում տղամարդկային հատկանիշները առաջնորդի անբաժանելի մասն էին կազմում: Նույնիսկ այսօր մենք տեսնում ենք դրա արտացոլումը մեր օրերում: Օրինակ` Մարգարետ Թետչերը ավելի ցածր, թավ ձայնով էր խոսում, որպեսզի այն ավելի քիչ կանացի հնչեր: Այնպես որ, պետք չէ զարմանալ այն փաստի վրա, որ Հին աշխարհում կին կառավարիչները երբեմն տղամարդկային հագուստ էին կրում, որպեսզի ամրապնդեին իրենց կառավարական ուժը:
Հատշեպսուտը փարավոնի դուստրն էր: Նա իր տղայի` Թութմոս 3-րդի խնամակալն էր և ք.ա. 16-րդ դարում կառավարել է Եգիպտոսը որպես փարավոն:
Հայտնի է, որ նրա կառավարման շրջանը Եգիպտոսի համար բարգավաճ ժամանակաշրջան է եղել:
Հատշեպսուտի արձաններն ու քանդակները ցույց են տալիս, որ նա հագնում էր փարավոնի հագուստ` ներառյալ նաև ավանդական արհեստական մորուքը: Այնուամենայնիվ, կան նաև քանդակներ, որտեղ նա կանացի հագուստ է կրում` ցույց տալով, որ Հատշեպսուտը հրաշալի էր թե՛ կառավարչի դերում` որպես փարավոն, թե՛ կնոջ դերում` իր առօրյայում:
6.Ժորժ Սանդ
Ժորժ Սանդը ֆրանսիացի կին գրող Ամանդինա Դյուպենի ծածկանունն է: Այն ժամանակաշրջանում, երբ ապրում էր Սանդը, կին գրողների համար սովորական էր փոխել իրենց անունները տղամարդկանց ծածկանունների, սակայն քչերն էին փոխում նաև իրենց հագուստները:
Սանդը սկանդալային կյանք էր վարում: Սկանդալային նույնիսկ 19-րդ դարի Ֆրանսիայի համար, քանի որ մի քանի տղամարդկանց հետ էր կապի մեջ` այդ թվում նաև Ֆրեդերիկ Շոպենի: Նա սիգար էր ծխում հասարակական վայրերում: Սակայն տղամարդու հագուստ կրելն էր, որ նրա համբավը այդքան գցեց: Նա նշում էր, որ տղամարդկանց հագուստն ավելի հարմար է և դրանով կարողանում էր վայելել իր ազատությունը: Տղամարդու հագուստով, երբ ոչ ոք չեր կասկածում նրա ով լինելը, նա կարողանում էր այցելել այնպիսի տեղեր, որտեղ չէր կարողանա լինել որպես կին:
5. Հանան Սնել
Պատմության մեջ շատ են հանդիպել կանայք, ովքեր թաքնված տղամարդկային կերպարի մեջ հայտնվել են զորքերում: Սակայն Հաննա Սնելի պատմությունը մի փոքր տարբերվում է մնացած կանանց պատմություններից, քանի որ նա ինքն իր կամքով ազատորեն բացահայտել է իր գաղտնիքը: Այսպես, Հնդկաստանում երկու տարի ծառայելուց հետո խմելիս Հաննան իր ծառայակիցներին հայտարարում է թե ինքը կին է` նշելով իր իրական անունը:
Ճակատամարտերի ժամանակ նա հասցրել է վիրավորվել, սակայն նրան հաջողվել է իր սեռի մասին գաղտնիքը հաջողությամբ պահել, հավանաբար ինքն իր վերքերը մշակելու և բուժելու միջոցով է նրան դա հաջողվել:
Երբ ավարտել է ծառայությունն ու վերադարձել Անգլիա, բացահայտել է իր գաղտնիքը` դրա մասին մի հրատարակչի պատմելով: Հետագայում Հաննան ամուսնանում է և փաբ բացում` այն անվանելով «Կին մարտիկ»:
4.Էդվարդ Հայդ
Էդվարդ Հայդը` Կլարենդոնի 3-րդ կոմսնը, Նյու Ջերսիի և Նյու Յորքի բրիտանացի կառավարիչն էր 1701-1708թթ.: Իրականում կոմսի թշնամիներն են նշել, որ նա երբեմն կանացի հագուստ էր կրում, այնպես որ այս տեղեկությունը չենք կարող վստահաբար որպես ճշմարտություն ընդունել: Ասվում է, որ երբ կոմսը հարբում էր, նա իր կնոջ հագուստն էր հագնում և նույնիսկ մի անգամ հայտնվել է պաշտոնական ընդունելության ժամանակ` նշելով, որ այդպես է հագնվել, քանի որ ներկայացնում է Անգլիայի թագուհուն այնտեղ և որ պետք է ներկայացնի այնքան հավատարմորեն, ինչքան հնարավոր է: Նորից պետք է նշենք, որ դեռևս չենք կարող ասել, թե արդյոք այս տեղեկությունները ճիշտ են, թե ոչ, սակայն հայտնի է, որ նրան ի վերջո զրկում են իր պաշտոնից, և նա մահանում է աղքատության մեջ` այնուամենայնիվ թաղվելով Ուեսթմինսթեր Էբբիում:
3.Կատալինա դե Էրաուսո
Կատալինա Էրաուսոն 17-րդ դարի իսպանացի կին էր, ով հայտնի է դառնում «Միանձնուհի դրոշակիր» անունով իր ծառայակից զինվորների շրջանում: Նրա կյանքի մասին մեզ հայտնի է իր իսկ գրած ինքնակենսագրականից, սակայն որոշ պատմություններ կասկածի տակ են առնվում: Սակայն անկասկած կարելի է ասել, որ նա հագնվել է տղամարդու պես և կռվել իսպանական զորքում Չիլիում և Պերուում: Նա որպես շարքային զինվոր էր ծառայում իր իսկ եղբոր հրամանատարությամբ, սակայն վերջինս նրան չէր ճանաչել: Երբ դուելի ժամանակ նա վիրավորվել է, մահանալուց վախենալով խոստովանել է, որ կին է: Երբ նա ապաքինվեց, այս անգամ խոստովանեց մի հոգևորականի, ով նրա գաղտնիքը հայտնեց բոլորին: Երբ Ֆրաուսոն վերադարձավ Իսպանիա, նա թագավորից զինվորական նպաստ պահանջեց, իսկ Պապի կողմից էլ թույլատրություն ստացավ տղամարդու հագուստ հագնել: Ի վերջո նա վերադարձավ Հարավային Ամերիկա և մինչև իր կյանքի վերջը ապրեց այնտեղ Անտոնիո դե Էրաուսո անունով:
2. Լանգոլենի տիկնայք
Էլիանոր Բաթլերը և Սառա Պոնսոնբին երկու հայտնի տիկնայք էին, ովքեր ծնվել էին 19-րդ դարում Դուբլինում և մոտ 3 կմ հեռավորության վրա ապրելով` մտերիմ ընկերներ են դառնում: Երբ Էլիանորը ամուսնության համար արդեն տարիքն առնում է, նրա ընտանիքը համոզում է նրան մենաստան տեղափոխվել: Իսկ Սառան, նմանատիպ իրավիճակում հայտնվելով, ամուսնանում է մի մարդու հետ, ում չէր սիրում: 1778թ.-ին երկու կանայք փախչում են իրենց ընտանիքներից, և երբ նրաց հետևում են, գտնում են կոծկվելու նպատակով տղամարդու նման հագնված: Առաջին անգամ նրանց չի հաջողվում փախչել, սակայն նրանք երկրորդ անգամ էլ են փորձում` այս անգամ մեկնելով Ուելս` Լանգոլեն, որտեղ նրանք տղամարդու նման կարճ կտրում են իրենց մազերը և գլխարկներ կրում: Չնայած նրանք առանձին էին ապրում` բոլորից հեռու, սակայն կարողացել են գրավել ժամանակի այնպիսի հայտնի մարդկանց ուշադրությունը, ինչպիսիք էին Բայրոնը, Սքոթը և նույնիսկ Շարլոթ թագուհին, ով այնքան էր հմայվել նրանցով, որ նպաստ է հատկացնում այս կանանց: Ավելի քան հիսուն տարի միասին ապրելուց հետո կանայք մահանում են ընդամենը 2 տարի տարբերությամբ:
1.Կավալեր դը Իոն
Կավալեր դը Իոնը իր կյանքի առաջին 50 տարին որպես տղամարդ է ապրել` Կարլոս անունով, իսկ իր կյանքի վերջին տասնամյակը` որպես կին` Շարլոտ անունով:
Մինչև տրանսվեստիզմ տերմինի ի հայտ գալը հակառակ սեռի հագուստ կրելը կոչում էին իոնիզմ` նրա անունով:
Զինվոր, դիվանագետ, լրտես ասպետը ուղարկվում է Ռուսաստան` Եղիզաբեթ կայսրուհու մոտ: Ֆրանսիայի և Ռուսաստանի միջև կապը բավականին լարված էր, և նա պետք է աղախնի պես հագնվեր ու գաղտնի տեղեկություն փոխանցեր Լուիս 15-րդին: Հետագայում նա նաև ծառայում էր Լոնդոնում Ֆրանսիայի դեսպանին, սակայն ինչպես պարզվում է, այնքան էլ հաջող չի անցել նրա ծառայությունը դեսպանի մոտ:
Դը Իոնը սկսեց հագնվել և ապրել որպես կին այն ժամանակ, երբ նրան արգելվեց վերադառնալ Ֆրանսիա: Նա պնդում էր, որ ինքը կին է, սակայն ֆրանսիական կառավարությունը հրաժարվեց կանանց համար նախատեսված նպաստ վճարել նրան, մինչև որ համապատասխան հագուստ չկրի: Այսպիսով, «կավալերը» դարձավ «մադմազել» դը Իոն:
Նա իր կյանքի վերջին տարիները անցկացրեց աղքատության մեջ, քանի որ Ֆրանսիական հեղափոխության բռնկումից դադարեցին նրան նպաստ վճարել: Նա մի փոքրիկ բնակարանում էր ապրում մի կնոջ հետ:
1810թ-ին, երբ նա մահացավ, բժիշկները պարզեցին, որ իրականում նա տղամարդ էր և ոչ թե կին:
