Ավստրալուհի Էշլի Սիմրաջն ամուսնացել է իր սիրելիի՝ Ջեյսոն Հեյլի հետ և հարսանիքից օրեր անց մահացել է քաղցկեղից:
Ինչպես հաղորդում է РИА Новости-ն՝ հղում անելով տեղի աղբյուրին, ավստրալուհու հոր խոսքով՝ դստեր մոտ երեք տարի առաջ, երբ նա 20 տարեկան էր, ելուստ են նկատել ոտքի վրա: Թերապևտն ասել է, որ դա սովորական գորտնուկ է, իսկ վիրաբույժը հաստատել է այդ ախտորոշումը, սակայն ոչ մեկը հետազոտություն չի անցկացրել:
Մեկ տարի անց նորագոյացությունն սկսել է արյունահոսել, ինչից հետո աղջիկն ուրիշ մասնագետի է դիմել, որը հետազոտությունից հետո հայտնել է, որ նրա մոտ մելանոմա է:
Պարզվել է, որ քաղցկեղն արդեն տարածվել է օրգանիզմով մեկ և մի քանի կենսական օրգան ախտահարել: Երկարատև բուժումն օգուտ չի տվել, և իմանալով, որ իրեն մի քանի օր է մնացել ապրելու, Էշլին որոշել է ամուսնանալ իր կյանքի սիրո հետ:
Արարողությունից հետո Էշլիին հիվանդանոց են տարել, սակայն որոշ ժամանակ անց նա վերադարձել է և վերջին օրերն անցկացրել հարազատների շրջապատում:
Այժմ Սիմրաջների ընտանիքը դատական գործ է սկսել նախնական սխալ ախտորոշում տված բժիշկների դեմ:
