1in.am-ը գրում է.
Մամուլի ազատության այս տարվա ցուցանիշով Հայաստանն աշխարհի 179 երկրների մեջ 74-րդ տեղում է եւ նախորդ տարվա համեմատ վեր է բարձրացել երեք հորիզոնականով: Մամուլի ազատության հերթական՝ այս տարվա ինդեքսն է հրապարակել «Լրագրողներ առանց սահմանների» կազմակերպությունը:
«Երկիր Մեդիա»-ի փոխանցմամբ՝ մամուլի ազատության համաշխարհային ինդեքսի ցուցատախտակում Ադրբեջանը 156-րդն է, Վրաստանը՝ 100-րդը, նրանք նույնպես մի քանի հորիզոնականով վեր են բարձրացել:
Ռուսաստանն ու Թուրքիան հակառակը՝ մի քանի հորիզոնականով իջել են՝ 148-րդ եւ 154-րդ տեղեր: «Սիրիայի հակամարտության հարցում քաղաքական կարեւոր դեր ունեցող Թուրքիան լրագրողների համար ամենամեծ բանտն է աշխարհում»,- ասված է զեկույցում:
Ինչպես անցյալ տարի, այս տարի էլ աշխարհում մամուլի ազատության ամենաբարձր ցուցանիշը գրանցած երկիրը Ֆինլանդիան է: Նույն տեղերում են մնացել, բայց ամենավերջում՝ Սիրիան, Թուրքմենստանը, Հյուսիսային Կորեան եւ Էրիթրեան: