Pastinfo.am-ը գրում է․
Դատավոր Աննա Դանիբեկյանը ժամանակավոր անաշխատունակության թերթիկ է ներկայացրել, սակայն այլ մանրամասների դատարանի աշխատակազմը չի տիրապետում: Այս մասին «Փաստինֆո»-ի հարցմանն ի պատասխան տեղեկացանք Երևանի ընդհանուր իրավասության դատարանի Շենգավիթ նստավայրից:
Նշենք, որ շուրջ երկու շաբաթ է, ինչ հայտնի է դարձել, որ դատավորը վիրահատվել է, սակայն հայտնի չէ, թե որքան կտևի հետվիրահատական շրջանը և արդյո՞ք դատավորը ստացիոնար բուժում է ստանում: Դատարանի աշխատակազմից դժվարացան պատասխանել վերոգրյալ հարցերին՝ նշելով, որ տեղեկատվության չեն տիրապետում:
Ավելի վաղ տեղեկացրել ենք, որ մարտի 17-ին նշանակված Ռոբերտ Քոչարյանի և մյուսների գործով դատական նիստը հետաձգվել էր՝ դատավորի վատառողջ լինելու պատճառաբանությամբ: Իսկ դրանից մեկ օր առաջ՝ մարտի 16-ի երեկոյան, պաշտպանները Ռոբերտ Քոչարյանին անձնական երաշխավորությամբ ազատ արձակելու մասին միջնորդություն էին ներկայացրել դատարան։ Ընդ որում՝ նախապես ճշտել էին դատարանից, որ նշանակված նիստը կայանալու է , բայց չի կայացել։ Ըստ պաշտոնական պարզաբանման՝ դատավորը վիրահատվել է և պարզ չէ, թե որքան կտևի հետվիրահատական շրջանը: Փաստաբան Հովհաննես Խուդոյանը դիմել էր Երևանի ընդհանուր իրավասության դատարանի նախագահին՝ խնդրելով միջնորդության քննությունը մակագրել այլ դատավորի, ինչը մերժվել է: Փաստաբան Արամ Վարդևանյանն էլ դիմել էր ՄԻՊ-ին և ԲԴԽ նախագահին՝ ներկայացնելով ստեղծված իրավիճակը։
Թեև ԲԴԽ նախագահը որոշել էր վերահասցեագրել Վարդևանյանի դիմումը և ուղարկել Երևանի դատարանի նախագահ Ա. Մկրտչյանին, սակայն պաշտպանը դեռևս չի ստացել ո՛չ ԲԴԽ նախագահի որոշումը, ոչ էլ՝ Երևանի դատարանի նախագահի որոշումը: Վարդևանյանի խոսքով՝ ՄԻՊ-ին ներկայացված դիմումից տեղեկատվություն ևս չունի, այն պարագայում, երբ ներկայացված հարցը հրատապ էր: Հարցին, թե արդյո՞ք օրենքով սահմանված ժամկետները չեն խախտվում, Վարդևանյանը պատասխանեց, որ այս հարցը պետք է դիտարկել ոչ թե ժամկետների տեսանկյունից , այլ՝ հենց հրատապության և անհապաղության:
Իսկ փաստաբան Հայկ Ալումյանն էլ վերաքննիչ բողոք է ներկայացրել դատավոր Աննա Դանիբեկյանի գործողությունների, ավելի ճիշտ անգործության դեմ։ Նա պահանջել է Ռոբերտ Քոչարյանին անձնական երաշխավորությամբ ազատ արձակելու մասին միջնորդությունը դատարանի կողմից չքննելը, դրա քննությունն անորոշ ժամկետով հետաձգելը ճանաչել ոչ իրավաչափ: Բողոքը մակագրվել է դատավոր Արմեն Բեկթաշյանին։
