Alibaba չինական կորպորացիայի հիմնադիր Ջեկ Ման (Մա Յուն) դարձել է Ասիայի ամենահարուստ մարդը՝ առաջ անցնելով Reliance Industries հնդկական հոլդինգի սեփականատեր Մուքեշ Ամբանիից: Այդ մասին վկայում են Bloomberg գործակալության հրապարակած տվյալները:
Գործակալությունը չինացու կարողությունը գնահատում է 44,5 մլրդ դոլար, ինչը նրան 18-րդն է դարձնում մոլորակի ամենահարուստ մարդկանց ցուցակում: Ամբանիի կարողությունը, որը, ըստ Bloomberg-ի տվյալների, շուրջ 5,8 մլրդ դոլար է կորցրել անցած 24 ժամվա ընթացքում, կազմում է 41,8 մլրդ դոլար (վարկանիշի 19-րդ տեղը): Գործակալության փորձագետները նշում են, որ Մային հաջողվել է կորուստները նվազագույնի հասցնել (գործակալության տվյալներով՝ գործարարի վնասն օրվա ընթացքում կազմել է շուրջ 1 մլրդ դոլար) շարժական հավելվածների և ընկերության ամպային պահոցների օգնությամբ տվյալների մշակման ծառայությունների աճող պահանջարկի շնորհիվ:
Alibaba ընկերությունը հիմնվել է 1999 թվականին և համարվում է աշխարհում խոշորագույն կազմակերպություններից մեկը, որն զբաղվում է էլեկտրոնային առևտրով և թվային վճարումներով: Ջեկ Ման իր պաշտոնը թողել է կորպորացիայի հիմնադրման 20-րդ տարեդարձին՝ 2019 թվականի սեպտեմբերի 10-ին:
