Ցեպեշը Ռումինիայի ազգային հերոս է և սուրբ։ Նա շատ լավ մարտիկ էր և պայքարում էր թուրքական էքսպանսիայի դեմ։ Սակայն ինչո՞ւ է ամբողջ աշխարհին հայտնի որպես վամպիր, որը խմում է անմեղ մարդկանց արյունը։ Հիմա կպարզաբանենք։

Ցեպեշի գործունեության հետ կապված գրեթե ամեն ինչ պատված է գաղտնիքով։ Նրա ծննդյան վայրը և տարեթիվը հստակ հայտնի չեն։ Վալախիան միջնադարյան Եվրոպայի ամենահանգիստ վայրերից չէր։ Անհամար պատերազմների և հրդեհների պատճառով մեծ թվով ձեռագիր հուշարձաններ են վերացել։ Միայն մի քանի տաճարական գրությունների շնորհիվ է հնարավոր դարձել վերականգնել իրական արքայազն Վլադի կերպարը, որը ժամանակակից աշխարհին հայտնի է Դրակուլա անունով։

Համարձակ զինվոր և հմուտ հրամանատար, անկեղծ հավատացող քրիստոնյա, որը միշտ առաջնորդվում էր բարոյականության և պարտքի նորմերով։ Վլադն աչքի էր ընկնում իր ֆիզիկական ուժով։ Նրա փառքի մասին գիտեր ողջ երկիրը։

Որպես պետական գործիչ՝ Վլադը պահպանում էր պատրիոտիզմի սկզբունքները՝ պայքար զավթողների դեմ, արհեստագործությունների զարգացում և առևտուր, պայքար հանցագործության դեմ։ Եվ այս բոլոր ոլորտներում Վլադ 3-րդը շատ կարճ ժամանակահատվածում հասավ իրական հաջողությունների։ Ժամանակակիցները պատմում էին, որ նրա կառավարման տարիներին կարելի էր ոսկե մանրադրամ գցել հատակին և մի քանի օր անց գալ և նույն տեղից կրկին վերցնել այն։ Ոչ ոք չէր համարձակվում ոչ միայն յուրացնել ուրիշի ոսկին, այլ նաև ձեռք տալ դրան։

Վլադ Ցեպեշի հիշատակի հանդեպ վերաբերմունքը ժամանակակից Ռումինիայում այնպիսին չէ, ինչպես եվրոպական այլ երկրներում։ Այսօր էլ շատերը նրան համարում են ազգային հերոս, որը ոտքի է կանգնեցրել Ռումինիան։ 14-րդ դարում արքայազն Բասարաբ 1-ինը Վալախիայի տարածքում փոքրիկ ինքնիշխան պետություն էր ստեղծել։ 1330 թվականին հունգարացիների հանդեպ տարած հաղթանակից հետո նրա իշխանությունն ավելի ամրապնդվեց։ Այնուհետև երկար պայքար սկսվեց խոշոր ֆեոդալների՝ բոյարների դեմ։ Հենվելով իրենց անսահման իշխանության վրա՝ նրանք դիմադրում էին կենտրոնական իշխանության ամբողջ երկրում իշխանություն հաստատելուն ուղղված ցանկացած քայլի։ Միևնույն ժամանակ, կախված քաղաքական իրավիճակից, նրանք անընդհատ դիմում էին հունգար-կաթոլիկներին և թուրք-մուսուլմաններին՝ նրանցից օգնություն ստանալու համար։ Հարյուր տարի անց Վլադ Ցեպեշը վերջ դրեց այդ պրակտիկային և մեկընդմիշտ լուծեց ապստամբությունների խնդիրը։

20-րդ դարի սկզբում՝ Բրեմ Ստոկերի «Գիշերվա զավակները» և «Վամպիր (Կոմս Դրակուլա)» ստեղծագործությունների, ինչպես նաև գերմանական դասական «Նոսֆերատու. սարսափի սիմֆոնիա» ֆիլմից հետո այս ստեղծագործությունների գլխավոր հերոսը՝ կոմս Դրակուլան, դարձավ գրական ամենահիշվող կերպարներից մեկը։ Վլադ 3-րդ Ցեպեշի և կոմս Դրակուլայի միջև կապի ստեղծումը սովորաբար բացատրում են այն հանգամանքով, որ Բրեմ Ստոկերը լսել էր մի առասպել, որի համաձայն՝ Ցեպեշը մահանալուց հետո դարձել է վամպիր։

20-րդ դարի կեսերին հայտնի «վամպիրի» գերեզմանին այցելության էին գալիս հազարավոր զբոսաշրջիկներ։ Բռնակալի հանդեպ անառողջ ուշադրությունը նվազեցնելու համար իշխանությունները տեղափոխեցին նրա գերեզմանը։ Ներկայումս այն գտնվում է կղզու վրա, և այն հսկում են տաճարի հոգևորականները։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել